NA̱JKHA̱ INÚN XABUANII
5. Aratamíjná májánʼ gajmiáanʼ ejña̱a̱nʼ
NDIÉJUUNʼ EYOO GÁʼTHÚU̱N RÁ.
Índo̱ xabuanii nutamijná májánʼ gajmiún e̱jñu̱ún nandoo nutamijná xóo endxaʼwamíjna̱ ga̱jma̱a̱ xóo ku̱mu̱ún.
NDÍJKHA RÍ GÍʼDOO NUMUU RÁ.
Dí maratamíjná ga̱jma̱a̱ʼ a̱ʼdiáaʼ bi̱ nindxu̱u̱ dxámá o dxáʼgú naʼni gakhi̱i̱. Nákha xóó chíjkhiin ejña̱a̱nʼ nutha̱a̱nʼ xúgííʼ, mú índo̱ nanii nánguá eñún gúthaanʼ májánʼ o nánguá ethaanʼ mbá kayuuʼ ga̱jma̱a̱ na̱nguá tayáá ndiéjuunʼ dí nundxaʼwamíjna̱ ga̱jma̱a̱ dí nakumu̱ún. Nindxu̱u̱ asndu xóo xtaa náa imbo̱ʼ ridoo mañu. Índo̱ narígá rígi̱ ikháán ndayóoʼ maratamíjná itháán gajmiáanʼ ejña̱a̱nʼ.
NDIÉJUUNʼ GÁNDOO MATANI RÁ.
Araxtaa xawii maratamíjná gajmaaʼ a̱ʼdiáaʼ. Atani̱ rígi̱ maski ajndu ndayóoʼ maguanáaʼ asndu wakhííʼ mu maratamíjná gajmaaʼ.
“Nguáná nandaaʼ maratha̱a̱n rígi̱: ‹¡Kañiʼ mbiʼi triʼgáánʼlú gi̱i̱, asndu ndiʼkhu̱ún nandaaʼ marathu̱nʼ ráʼ.!› Mú, náá numuu dí mataxiéʼkhá á mu a̱ʼdiáaʼ nandoo maʼtháanʼ dí eku̱mu̱u̱ rá. Lá raʼkháa rúʼko̱ eyulú muni e̱jñu̱lúʼ ráʼ.” (Lisa.)
“Naniguʼ maʼgáaʼ gígú miʼcha̱á, mú itháán natamíjná májánʼ gajmíʼ e̱ji̱nʼ nda̱wa̱á dí tikhu nduʼun” (Alberto).
IKHA RÍ NA̱ʼKHA̱ NÁA BIBLIA: “Nimbáa xáyáʼ rí mambáyúu ikha̱á, gáyáʼ dí mambáñún eʼwíinʼ” (1 Corintios 10:24).
Atagíʼ edxa̱a̱ʼ. Mbáa xa̱bu̱ nikhi̱i̱ naʼthí rígi̱: “Nguáná índo̱ e̱ji̱nʼ nuthu̱nʼ, nagíʼdu̱u̱ nandxa̱ʼwa̱mínáʼ imbo̱o̱ dí maʼni. Mú ikhiin nduyáá índo̱ nani rígi̱”.
Á mu xúʼko̱ tagíʼníí mangáán, atatsi̱juíiʼ teliáaʼ á mu xtaa ratayáá ga̱jma̱a̱ atatsíñáánʼ ratayáá celular ndrígáaʼ. Atagíʼ edxa̱a̱ʼ dí xtáa raʼtháanʼ a̱ʼdiáaʼ, xúʼko̱ matasngajmáá dí naxmiéjua̱a̱nʼ mangáánʼ dí ikhaa naʼni maxmiéjuunʼ, maski má ikháán natayáá dí na̱nguá má gíʼdoo wéñuuʼ numuu.
“Ndayóoʼ dí e̱jñu̱lú mbuyáá dí naxmiénjulú dí ikhiin ku̱mu̱ún. Á mu nusngajmá dí na̱nguá exmiéjulú xóo ku̱mu̱ún ni xúthulú o mbuñíinʼ eʼwíinʼ tsíin mumbañún” (Miranda).
“Xákiʼnáánʼ mbá nache, maski ajndu raʼkhí dí naʼthí” (Antonio).
IKHA RÍ NA̱ʼKHA̱ NÁA BIBLIA: “Gudxawíín májánʼ” (Lucas 8:18).
Gákuwáanʼ xawii mudxawíín. Nguáná jiámá o wa̱ʼxa̱ʼ tséʼñúún gakhi̱i̱ mutamijná gajmiún xabuanii índo̱ nándáa dí eni̱.
“Ikháanʼxu nutamíjnáxu índo̱ na̱jkua̱ ga̱jma̱a̱ karru. Nutamíjnáxu itháán májánʼ índo̱ magiʼi náa nijñúnʼ ki xóo magiʼi náa inuʼ” (Nicolasa).
Índo̱ nutrigáanʼ nuphiʼtsu ma̱ndoo mutamíjná gajmiá e̱jña̱la.
“Índo̱ nuphiʼtsuxu wakhíʼ, nutaxu ndiéjuunʼ dí niguáʼníí kañiʼ mbiʼi xóo dí májánʼ ga̱jma̱a̱ dí ra̱májánʼ. Dí nunixu rígi̱ nambáyúxu mu makuwáanʼ mbóó jnduʼ ga̱jma̱a̱ naʼni mbuyaxu̱ dí xáʼyóoʼ muraʼníí i̱ndó ikháanʼ xkujndu” (Román).
IKHA RÍ NA̱ʼKHA̱ NÁA BIBLIA: “Xúgiáanʼ gíʼmaa makuwáanʼ xawii mudxawíín, mú xútala mbá nacha̱” (Santiago 1:19).
