Ku vulavurisana lokunene ku endleka loko wena ni vana va wena mi byelana leswi mi swi ehleketaka ni ndlela leyi mi titwaka ha yona.

Swi nga ha tika ku burisana ni vana lava nga emalembeni ya vuntshwa. Loko vana va wena va ha ri vatsongo a va ku byela xin’wana ni xin’wana. Kambe leswi se va nga emalembeni ya vuntshwa, a swa ha ri tano naswona a wa ha yi tivi ndlela leyi va titwaka ha yona. Swi fana ni loko va yime eka tlhelo rin’wana ra nambu lowukulu kasi wena u yime eka tlhelo lerin’wana. Hambiloko va nga ha swi tsakeli ku phofula ndlela leyi va titwaka ha yona kambe tinyike nkarhi wo burisana na vona!

Tinyike nkarhi loko n’wana wa wena a lava ku vulavula na wena. Vulavurisana na yena hambiloko a lava leswaku mi vulavula nivusiku.

“U nga ha ringeka ku vula u ku, ‘U lava ku vulavula na mina hi nkarhi wa wena! Kasi a hi nga ri swin’we siku hinkwaro?’ A hi fanelanga hi gungula loko vana va lava ku vulavurisana na hina. Vatswari va tsaka loko va vulavurisana ni vana va vona.”—Lisa.

“Ndzi rhandza ku hatla ndzi etlela kambe hakanyingi ni vusiku hi kona laha ndzi burisanaka kahle ni vana va mina.”—Herbert.

NSINYA WA NAWU WA LE BIBELENI: “Un’wana ni un’wana a a hambete a lava leswaku ku pfuneka un’wana, hayi yena n’wini.”—1 Vakorinto 10:24.

U nga pfumeli ku kavanyetiwa. Tatana un’wana u ri: “Mikarhi yin’wana ndzi pfa ndzi ehleketa hi swin’wana loko vana va mina va vulavula na mina. Kambe, va swi xiya leswaku a ndzi le ka vona, ndzi va ndzi ri eku ehleketeni hi swin’wana!”

U nga pfumeli ku kavanyetiwa hi TV kumbe hi switirhisiwa swin’wana swa elektroniki. Yingisela leswi n’wana wa wena a swi vulaka naswona teka mhaka ya yena yi ri ya nkoka hambiloko yi ti komba yi nga ri ya nkoka eka wena.

“Hi fanele hi tiyisekisa vana va hina leswaku ndlela leyi va titwaka ha yona i ya nkoka eka hina. Loko hi nga endli tano, a va nge hi byeli leswi va karhata naswona va ta lava mpfuno eka vanhu van’wana.”—Maranda.

“U nga hlundzuki loko n’wana wa wena a vula swilo leswi hoxeke.”—Anthony.

NSINYA WA NAWU WA LE BIBELENI: “Nyikelani nyingiso eka ndlela leyi mi yingisaka ha yona.”—Luka 8:18.

Tirhisa nkarhi wutsongo lowu u wu kumaka. Mikarhi yin’wana vana swa va olovela ku tiphofula loko va ri eku tihungaseni ni vatswari va vona.

“Hi vulavurisana na vona loko hi famba hi movha. Swa olova ku burisana na vona hi ndlela leyinene loko hi ri emovheni tanihi leswi hinkwerhu hi languteke laha hi ya ka kona.”—Nicole.

Nkarhi wa swakudya i nkarhi wun’wana lowu mi nga burisanaka ha wona.

“Loko hi ri karhi hi dya nimadyambu hi bula hi swilo leswi hi karhateke ni leswi hi tsakiseke swa siku rero. Sweswo swi endla hi va ni vun’we naswona swi endla leswaku ha un’we wa hina a swi xiya leswaku a nge swi koti ku langutana ni swiphiqo a ri yexe.”—Robin.

NSINYA WA NAWU WA LE BIBELENI: “Hatlisa emhakeni yo twa [u] nonoka emhakeni yo vulavula.”—Yakobo 1:19.