E tupu te aparauraa mau i roto ia outou i ta outou mau tamarii ia horoa te tahi e te tahi i to ˈna manaˈo e huru aau.

E ere i te mea ohie ia aparau i te taurearea. I te nainairaa ta outou mau tamarii, e faaite pauroa ratou ia outou. I teie nei râ e taurearea ratou, aita ratou e paraparau rahi faahou ra ia outou, e aita outou i ite i to ratou manaˈo e huru aau. Mai te huru ra te tia ra outou i te tahi e te tahi pae o te hoê anavai rahi. Eiaha râ e hapehia, teie te taime e hinaaro ai ta outou mau tamarii ia aparau outou ia ratou!

A aparau i ta outou tamarii i te taime oia e hinaaro ai. Ia na reira outou, noa ˈtu tei te maororaa po.

“E hinaaro paha outou e parau, ‘I teie nei ïa oe e hinaaro ai e aparau? Tâua hoi teie mahana taatoa!’ Eaha râ tatou e amuamu ai ia haamahora ta tatou tamarii i to ˈna aau ia tatou? E ere anei tera ta te mau metua atoa e hinaaro?”—Lisa.

“E taoto oioi na vau, pinepine râ ua aahiata ia aparau maitai au e ta ˈu mau tamarii taurearea.”—Herbert.

ARATAIRAA BIBILIA: “Ia imi te taata tataitahi, eiaha i to ˈna iho maitai, i to vetahi ê râ.”​—Korinetia 1, 10:24.

Eiaha te tahi atu ohipa ia haafifi ia oe. Te faˈi nei te hoê metua tane: “I te tahi te taime ia paraparau mai ta ˈu mau tamarii ia ˈu, e ohipa ê ta ˈu e feruri ra. Eita râ ta ˈu e nehenehe e haavare ia ratou, te ite mai ra ratou!”

Mai te peu mai tera atoa oe, a tupohe i te afata teata e a vaiiho i te tahi atu mau matini. A faaroo maitai i ta ta oe tamarii e parau ra, e a haapao maitai i ta ˈna e haapeapea ra, noa ˈtu no oe e ere i te mea faufaa roa.

“E tia ia haapapu i ta tatou mau tamarii e mea faufaa to tatou mau huru aau no tatou. Aita anaˈe, eita ratou e faaite mai i to ratou mau haapeapearaa e e fariu i te tahi atu taata no te ani i te tauturu.”—Maranda.

“Eiaha e iria, noa ˈtu ua hape te manaˈo o ta oe tamarii.”—Anthony.

ARATAIRAA BIBILIA: “A faaroo maitai.”​—Luka 8:18.

A imi i te mau ravea no te aparau. I te tahi taime, mea faaroo te tamarii i to ratou metua a rave ai i te ohipa i te parahi-noa-raa i mua ia ratou a aparau atu ai.

“E aparau matou ia tere matou na nia i te pereoo. Mea au aˈe hoi ia parahi te tahi i pihai iho i te tahi, i te parahiraa te tahi i mua i te tahi no te aparau.”—Nicole.

Mea au atoa ia aparau i te taime tamaaraa.

“Ia tamaa matou i te ahiahi, e faatia na matou i ta matou i farerei i te roaraa o te mahana, te mea maitai e te mea ino. E piri atu â ïa matou te tahi i te tahi e ua taa ia matou e ere o matou anaˈe i mua i te fifi.”—Robin.

ARATAIRAA BIBILIA: “Ia ineine te taata atoa i te faaroo e tia ˈi, eiaha e ru i te paraparau.”​—Iakobo 1:19.