АНАЙ-АТАЙЁСЛЫ
5-тӥ визь-кенеш. Нылпиосыныды вераське
МАЕ СО ВОЗЬМАТЭ
Анай-атайёс но нылпиос ог-огенызы зэмзэ ик верасько, куке соос ог-огзылы кышкатэк вераны быгато асьсэлэсь малпанъёссэс но шӧдонъёссэс.
МАЛЫ СО КУЛЭ
Анай-атайёслы тужгес но секыт вераськыны быдэ вуымтэ пиналъёсынызы. «Оло нош, али гинэ нылпиды тӥледлы ваньзэ вера вал,— верамын одӥг книгаын.— Нош бадӟымгес будыса, со тӥледлы аслэсьтыз малпанъёссэ но шӧдонъёссэ сомында уг вера ни» (Breaking the Code). Тӥледлы потэ ке но, нылпидылэн вераськемез уг поты шуыса, тӥледлы соин вераськоно, малы ке шуоно со нылпидылы туж кулэ!
МАР КАРЫНЫ ЛУОЗ
Котьку дась луэ кылзыны. Куддыръя со понна бер изьыны но выдоно луэ.
«Куд-ог дыръя верам потэ: „Тынад али вераськемед потэ-а?! Вазьгес уг луы вал-а? Асьмеос быдэс нунал ӵош вал ук!“ Нош яра-а вожез поттыны, нылпилэн вераськемез потэ ке? Ӵапак сое возьма ук котькудӥз атай но анай» (Лиза).
«Мон яратӥсько вазьгес изьыны выдыны. Но ӵем дыръя нылпиосыным сюлмысь вераськыны пӧрме вал уйшор бере гинэ» (Герберт).
БИБЛИЫСЬ ВИЗЬ-КЕНЕШ: «Нокин но аслыз пайда медаз утча, мукетызлы мед утчалоз» (1 Коринфъёслы 10:24).
Номыр но тӥледлы медаз люкеты. Одӥг атай вера: «Куддыръя мон шӧдӥсько, нылпиосыным вераськыкум, мон аслэсьтымзэ малпасько шуыса. Нош соос ваньзэ адӟо, соосты уд пӧя!»
Тӥляд но озьы луэ ке, кысэ телевизордэс но вань электрон тӥрлыкъёстэс палэнэ понэ. Нылпидылэн верамез тӥледлы кулэтэм кадь потэ ке но, дырдэс висъялэ нылпидылы но сак кылзэ сое.
«Нылпиосмылы возьматыны кулэ, ми соослэсь шӧдонъёссэс валаны тыршиськомы шуыса. Соос сое ӧз шӧдэ ке, сюлмаськонъёссэс воксё уз вералэ ни яке мукет муртлэсь юрттэтсэ курозы» (Маранда).
«Асьтэды кияды возе, нылпидылэн верамез тӥледыз туж паймытэ ке но» (Энтони).
БИБЛИЫСЬ ВИЗЬ-КЕНЕШ: «Чаклалэ, мае [«кызьы», Выль дуннелэн берыктэмез] тӥ кылзӥськоды» (Лука 8:18).
Нылпиеныды мар ке карыку вераське. Нылпидэс вадьсады пуктӥды ке но юанъёс сётъяды ке, со тӥледлы сюлэмзэ уз усьты, дыр.
«Ми машинаын вераськиськомы. Артэ пукыку, нылпи мылысь-кыдысьгес вераське» (Николь).
Ӝӧк сьӧрын пукыса вераськон — эшшо одӥгез луонлык тодыны, мар нылпилэн сюлмаз.
«Милям умой сяммы вань. Ӝыт сиськыкумы, ми ог-огмылы вераськомы, мар умоез, нош мар уродэз вал нунал куспын. Со туж огазея милемыз но валаны юрттэ, ми огнамы ӧвӧл шуыса» (Робин).
БИБЛИЫСЬ ВИЗЬ-КЕНЕШ: «Котькудӥз адями кылзӥськись мед луоз, кыл вераны дыртӥсьтэм» (Иаков 1:19).
Тӥледлы тунсыко луоз, дыр
БИБЛИЫСЬ ДЫШЕТОНЪЁС
Егитъёслы юрттэт
Тодэ, кызьы Библия юрттыны быгатэ егитъёслы шуг-секытъёссэс сэрттыны-пертчыны.
