DANJEP MANJEP ENAM WAL
5: Yu Ninam
NALNE PILDOM
Yu ka ninam padom e, nim na ngalnem man bol kumbol a na bunuman a seim yu, ne yemyem enam pildom.
NALENDE WAL KERMA PAIM
Ngang ambel baril meim kunum, enjep bol yuka nepisel amin napaim. Buk ende kangem Breaking the Code embe dom: “Ngal, plai enam ne bol seim bar mine pu esim, ba nim bulto wei mein, wal esim mal kanpol naronon. Nim wal ende endel e, bulto mein sikele wo ngimba bol kes mo ka ende senda bar molo, wal esim kanjel bar morol.” Kunum ele ngal nim bol yu ninam kanapisam, ba nim enjep bol yu nindel wal kerma paim!
NIM ENDEL WAL
Ngalnem yu ninal ne pisa kunum olom bol yu nindel. E taman tuwal-pra.
“Nim embe ninal nepisel, ‘Nim yipe yu ninal nepisen mo? Na yipe nim bol kunum pel mond!’ Ngalnem nim bol yu ninal nepisa kunum, nalende nim yu dongal embe nindel? Danjep manjep ngal bol yu ninam kanapisim mo?”—Lisa.
“Emil tuwal wur paninal kapinj, ba ngangna na ambilna barel bol yu nine erind.”—Ebet.
BAIBEL KOLTA YU: “Enem porpor wal ere alamb ende pakeronam bar pisam, wal ere enem enem pakeronam bar napisam.”—1 Korin 10:24.
Bu keli kol nawanja. Ngal danjep ende embe nim: “Na kunum pende ne ngalna yu nim komol kase napilpile erind. Na enjep yu gend nengonal kaple naerim, nalerim enjep—pilkane enjip!”
Nim wal embe ding mal ere erin pamdal, TV na mobail togorol. Ngalnem yu dom bar komol kase pisel, olom bunuman paim mal kanpol tondol, e wal kere kere pra.
“Kenem ngaljen man bunuman na kumbol a nalmal pisim, kenem bol wal kerma paim panengopo pisam. Enjep nalmal pisim mal kenem si wal kerma napakjin dal, kumbol a seim wal ne kenem nangonam, mo wusngalem jel ende kur pake sinam ne enam.”—Maranda.
“Ngalnem bunuman dulto nasim dal, nim yu puli ne popol nasindel.”—Antoni.
BAIBEL KOLTA YU: “Enem komol se yu pisim mem e omuk karonam.”—Luk 8:18.
Kunum jeljel enjep bol yu nindel. Ngal pende danjep manjep bol yunim, ba ngumbdal a kane yu nanim.
“Kin kar a punjin kunum anj dunglom kongan ka enjin. Kin ende ende bol mand mand amine molo yuka nepinjin.”—Nikol.
Mokun nomon meimen kunum ngal bol yu ninamen kol apis kerem.
“Mokun nomon kunum, mambnem kes na ka tangaling mine wom mal yubol tomon. Mambnem embe esmen pakerondo kin tapka tomon, ala ombun panda kunum pake sinamen mal pilkane esmen eri.”—Robin.
BAIBEL KOLTA YU: “Komol kase yu pisel, [ala] wamnam bol yune yem nakerel.”—Jems 1:19.
