Robdzanhamri uptabi hã te tihöiba a hã duré aiꞌra norĩ aipẽꞌẽ na duré atsimirotsaꞌrata na atsima atsiwatsuꞌu dzaꞌra waꞌaba wamhã.

Nimahã na hã pire uptabi di robdzanhamri da hã ĩhöibatém norĩ ma. Aiꞌra norĩ dzahadu aiꞌuté ré hã te aré natsi tãma ĩrobdzanhamri dzaꞌra uburé na. Tadzahã, ãhãna hã höibatéb ré tsuru na te aima robdzanhamri dzaꞌra duré aima waihuꞌu õ di ĩpẽꞌẽ dzaꞌra ꞌremhã duré ĩtsimirotsaꞌrata dzaꞌra hã. A hã ĩꞌatsam ne panhoꞌõmo dzadaꞌré na duré aiꞌra ĩtsam ne dzara niwĩ. Aiꞌra norĩ te te aima robdzanhamri dze dzaꞌra õ nherẽ, ãhãna hã danhipai u te tsô tirowaptöꞌö dzaꞌra atsimirobdzanhamridzéb dzô!

Atsiwatsutu robdzanhamri da aiꞌra ma tsiwaꞌru bötö na. Ãne ꞌmanharĩ aiwi mara uptabi nherẽ.

“Ãté te ĩrotsaꞌra, ‘bötö bö watsiré wahöimana nherẽ, e ãne waptsi bö te dza ĩ̱ma ĩrobdzanha.’ Tadzahã, e tô tsena wa dza aiwaptsari dzaꞌra ni waꞌra norĩ wama tsiwatsuꞌu dzaꞌra da wamhã. Damama norĩ ma, robdze ti tiꞌra tãma tsiwatsuꞌu wẽ te.” — Lisa.

“Mara uptabi na ĩ̱nhotõ dzei õ di. Tadzahã ahö na wa tô robdzanhamri wẽ ĩ̱ꞌra ĩhöibatém norĩ ma, mara uptabi na tsi.” — Herbert.

ROPOTOꞌWAI MREME NHIMIROTI: ‘ꞌRöwip tsi ꞌre atsipawaptob dzaꞌra waꞌaba mono da, atsina ꞌre rotsaꞌrata dzaꞌra waꞌaba mono õ di dza. Atsiré ĩtsadzeiꞌwa norĩ hã ꞌre pawaptob dzaꞌra waꞌaba mono da tsi, te dza ta norĩ ãma ꞌre ĩrotsaꞌrata uꞌötsi dzaꞌra waꞌaba mo.’ — 1 Coríntios 10:24.

Atsimipari petse. Damama te tsiwatsuꞌu: “Nimahã na hã, ĩ̱ꞌra norĩ te te ĩ̱ma robdzanhamri dzaꞌra ré marĩ ĩhöiba amo na wa rotsaꞌrata, duré tô tsena te te ꞌmadöꞌö waihuꞌu petse dzaꞌra di ĩ̱nhimipari õ na hã!”

Ãhã damama ne ꞌmanharĩ wamhã, wĩrĩ ĩropodo duré rẽme ate dahörödzé niwamhã tablet. Atsimipari petse aiꞌra te te ĩnharĩdzém na. Höiꞌré na ãma ĩrotsaꞌrata na tsô ĩwatobrodzém na, taré hötöꞌö nherẽ aima hã.

“Wa te ĩhöiꞌré dzaꞌra da tsi waꞌra norĩ ma ĩpẽꞌẽ dzaꞌra ꞌremhã wama ĩpire na hã. Ãne wa te ꞌmanharĩ dzaꞌra õ wamhã, wama tsiwatsuꞌu dzaꞌra õ di dza niwamhã ĩhöiba amo nhimipawaptobdzéb dzô te dza tsô tirĩtĩ dzaꞌra.” — Maranda.

“Atsiꞌrãi waꞌro tõ aiꞌra nhimirotsaꞌrada wẽꞌõre nherẽ.” — Anthony.

ROPOTOꞌWAI MREME NHIMIROTI: ‘Maꞌãpé ãma ꞌre pibui petse dzaꞌra waꞌaba mono, ĩ̱mreme ꞌre ĩwapari dzaꞌra waꞌaba mono dzém na hã.’ — Lucas 8:18.

Robdzanhamri natsi rowẽ ré. Nimahã na pire di ĩhöibatém norĩ ma tsõꞌawi te te robdzanhamri dzaꞌra da damama duré dana norĩ nhoꞌre.

“Nimomo robduri na watsitsaꞌrei wamhã, wa natsi watsima robdzanhamri dzaꞌra ni. Watsitsati watsiꞌubumroi wa, wanhoꞌre watsiꞌubumroi ãna, robdzanhamri dze ti.” — Nicole.

Datsaihuri ré duré wẽ uptabi di romharé na robdzanhamri da hã.

“Barana watsaihuri ré, wa natsi robdzanhamri dzaꞌra ni marĩ ĩwẽ duré marĩ ĩwatsédé wadzô ĩwatobro na hã õhõ bötö na. Taha na, watsitẽme wa watsina rotété dzaꞌra ni duré wama waihuꞌu petse di watsiwaprotsi ĩwahöimana dzaꞌra õ na hã ropire wa te ꞌwapé dzaꞌra da.” — Robin.

ROPOTOꞌWAI MREME NHIMIROTI: ‘ꞌRe atsitsaꞌra petse uꞌötsi dzaꞌra waꞌaba mono, aꞌö ꞌre dawapari dzaꞌra waꞌaba mono da hã. Aimreme hã ꞌre tsani tsuꞌu dzaꞌra waꞌaba mono tõ, aꞌö.’ — Tiago 1:19.