Kuŵechetana kwambone kukusasosekwa kuti nangolo soni mwanache aŵeje ŵagopoka kusala nganisyo syawo soni mwakupikanila mumtima.

Kuŵechetana mpaka kuŵe kwakusawusya mnopemnope ŵanache payiche msingu wachinyamata. Nambope buku jine jatite, “Ŵanache pali ŵachinandipile akusasala chilichose kwa achinangolo ŵawo. Nambo pakusile akusatanda kusala yamnono yayikusatendekasya kuti achinangolo akamanyililaga nganisyo sya ŵanachewo soni mwakupikanila mumtima.” Atamose yili mkuwoneka kuti ŵachinyamatawo ngakusasaka kuŵechetana, nambope jeleji jili ndaŵi jakusosekwa mnope kuŵechetanaga nawo.

Aŵeje ŵakoseka kuŵechetana ni mwanache jwawo. Akusosekwa kutenda yeleyi atamose chilo.

Lisa jwatite, “Mumtima mpaka aŵechete kuti, ‘Apano ni pamkusaka kuŵechetana? Nambotu twaliji yimpepe lisiku lyosope.’ Ana tukusosekwa kudandawula naga ŵanache ŵetu akusaka kuti tuŵechetane? Ana yeleyi ngati ni yakusajembecheya nangolo jwalijose kwa ŵanache?”

Herbert jwatite, “Atamose nganisakaga gona mwakuchelewa, nambo kuti mbechetane chenene ni ŵanache ŵangu twasosekwaga kuŵechetana mpaka kupunda pasikati chilo.”

MFUNDO JA M’BAIBULO: “Mundu jwalijose akagambaga kulisosela jikape yambone, nambo mnopemnope ŵasoseleje achimjakwe.”—1 Akolinto 10:24.

Akakunda yindu yine kwasokonasya. Jwamlume jwine jwali nangolo jwasasile kuti, “Ndaŵi sine ŵanache ŵangu pakuŵecheta ni une ngusaŵaga ndili mkuganisya yindu yine. Kaneko ŵanachewo akusayikopochela kuti ngangwapikanila ligongo lyakuti nguganisya yine yakwe.”

Naga yeleyi yikwatendechela ligongo lyakuti akulolela TV kapena yindu yine mpela foni, mpaka agambe kusimisya kaje. Akoleje lung’wanu mwanache jwawo pakuŵecheta, soni ampikanileje atamose kuti yakuŵechetayo yikuwoneka mpela yangali masengo kwa wawojo.

Jwamkongwe jwine lina lyakwe Maranda jwatite, “Tukusosekwa kwasimichisya ŵanache ŵetu kuti nganisyo syawo sili syakusosekwa mnope. Naga wawojo akusasiwona nganisyo sya ŵanachewo kuŵa syangali mate, ŵanache ŵangasalaga chilichose kapena mpaka akasalile ŵandu ŵane kuti ŵakamuchisye.”

Anthony jwatite, “Akatendaga yindu mwakupundanganya atamose kuti yakuŵecheta mwanagwawojo yili yangakamuchisya.”

MFUNDO JA M’BAIBULO: “Mlolechesye kuti mkupikanila mwakusamala”—Luka 8:18.

Apatilejepo upile wakuŵechetana ni ŵanache pali yalumo. Ndaŵi sine ŵanache akusaŵecheta mwagopoka naga ngakulolegana ni nangolo jwawo meso ni meso.

Jwamkongwe jwine lina lyakwe Nicole jwatite, “Tukusapatilapo upile wakuŵechetana ni ŵanache ŵetu patuli yalumo m’galimoto. Tukusatama mwakuŵandikana yayikusatukamuchisya kuti tuŵechetaneje chenene.”

Pa ndaŵi ja yakulya mpaka tupatilesoni upile wakuŵechetana ni ŵanache ŵetu.

Robin jwatite, “Pachakulya chaligulo, jwalijose akusasala yindu yakusakala soni yambone yayimtendechele pa lisikulyo. Yeleyi yikusatukamuchisya kuŵa ŵakamulana soni jwalijose akusamanyilila kuti akusosekwa chikamuchisyo kutyochela kwa ŵane pa yakusawusya yasimene nayo.”

MFUNDO JA M’BAIBULO: ‘Aŵeje ŵakwanguya kupikana [soni] ŵangawutuchila kuŵecheta.’—Yakobo 1:19.