Ora riniʼné ca padre ca xiiñicaʼ, racaneni gánnacaʼ xi cayácacabe ne xi cayuni sentírcabe.

Nagana güiné binni xiiñiʼ diidxaʼ ora maʼ ziniisi. Libru ni láʼ Tú no me escuchas, yo no te entiendo cusiene ximodo zándaca runi sentir ti padre. Dxiqué «cadi nagana guiníʼneluʼ ca xiiñiluʼ ne gábicaʼ lii xi cayácacaʼ, peru ora maʼ huaniisicaʼ la? jma rácani nagana ne nuu biaje qué riénenu laacabe». Peru ni caquiiñeʼ gánnaluʼ nga oracapeʼ jma caquiiñeʼ ca xiiñiluʼ de lii.

Bizaalaʼdxiʼ ni caquiiñeʼ xiiñiluʼ. Bicaadiaga laabe neca maʼ huaxhinni.

Lisa guníʼ: «Nuu biaje zándaca guiniʼluʼ: “¡Guidubi dxi guyuʼnu juntu, ¿ne nagasi nápaluʼ gana guininu la?!”. Peru xiñee cayaca quejarluʼ, ¿ñee cadi nga nga ni racalaʼdxiʼ ti padre la? ¿Gucaadiágacaʼ xiiñicaʼ la?».

Herbert ná: «Riuuladxeʼ chigaseʼ tempranu, peru stale biaje jma galán huayueniáʼ ca xiiñeʼ diidxaʼ despué de galaa gueelaʼ».

CONSEJU ZEEDA LU BIBLIA: «Cada tobi guyubi modo gacané stobi ne cadi guyubi para laasi» (1 Corintios 10:24).

Bicaadiaga ca xiiñiluʼ. Ti padre guníʼ: «Nuu biaje ora caniʼné ca xiiñeʼ naa la? gadxé ni caníʼ ique ne laacabe rudiicabe cuenta».

Pa rúniluʼ zacá la? naquiiñeʼ gusuiʼluʼ televisión stiluʼ ne cadi iquiiñeluʼ ca dispositivu electrónicu ca. Bicaadiaga chaahuiʼ ni cayabi xiiñiluʼ lii, zacá zusihuínniluʼ laaca rizaaláʼdxiluʼ xi cayácabe neca ruluíʼ cadi nagana ni cazaacabe.

Maranda bizeeteʼ: «Nabé risaca gucaʼdiáganu ca xiiñinu ne gánnanu xi cayuni sentírcabe. Purtiʼ pacaa la? zuyúbicabe tu gacané laacabe sti ladu».

Anthony guníʼ: «Cadi guidxagayaaluʼ ne cadi guidxiichiluʼ pa guiníʼ xiiñiluʼ xiixa diidxaʼ ni cadi jneza».

CONSEJU ZEEDA LU BIBLIA: «Laguuyaʼ chaahuiʼ ximodo rucaadiágatu» (Lucas 8:18).

Biyubi modo guiníʼneluʼ ca xiiñiluʼ. Nuu biaje jma riuulaʼdxiʼ ca joven guiníʼnecaʼ bixhózecaʼ ne jñaacaʼ ora guirutiʼ cuchiiñaʼ laacaʼ.

Nicole ná: «Ora maʼ ziuudu de biaje, ribeedu tiempu para güínedu ca xiiñidu diidxaʼ».

Laaca galán güinu diidxaʼ ora guendaró.

Robin bizeeteʼ: «Ora maʼ cadoʼxhidu, rinidu ximodo guyé ni laadu, nga racané laadu chuʼdu tobi si ne laaca rusietenaláʼdxini laadu cadi nuudu stúbidu».

CONSEJU ZEEDA LU BIBLIA: «Naquiiñeʼ chuʼtu listu para gucaadiágatu, cadi casi zetu gundaa ruaatu xiixa diidxaʼ» (Santiago 1:19).