Ndikidi fugo dagbase namanga ho avunguagude gbiati awiriyo afura ni tipa gayo aberãpai gbiati gayo abipai dagbatiyo.

Fugo dagbase ima rengba ka du ni kpakarakpakaraha gbe na paranga agude. Isoke barambeda kusayo, gu buku nga Breaking the Code agumba gupai nga “ho du agude ni rukutu i nafura na avunguyo riipa ai pai ono ho i asona ni si ni bambumbuhe tipa i fura na avunguyo wa gu naanidu mbata. Na gipai re nasaha fu avunguyo ni kpakarakpakaraha i ini agu aberãpai gbiati bipai du awiriyo na ni.” Zavura ti gu regbo si angera wa agude na nyemu ka fura te, boro gure nga gu regbo nzunzu agude aida na wene fugo dagbase gbe!

Mo du nga regerege ka fura na wiro ho u aida ka fura ni. Mo mangi gipai reka si vura du vurũ nga u naida oni fura bebere yuru.

“Mo ima rengba kaa bihe nga, ‘Awere du mo aida ka fura? Ani du areme na mo rogo gi uru re naabaha!’ Ono waigu rengbe ani kaa kpakanahe ka si du nga awirani naida ka kusuko kpotoyo yo furani? Anga gure nga gupai avunguagude dunduko amaabangiriyo tipaha te?”—Lisa.

“Mi ima kpinyemu rame, ono agu awene afugo dagbase nidu dagbare na paranga awire si nidu tingbafuo bebere yuru.”—Herbert.

BANGUA RENGO NGA GA BAIBIRI: “Ka boro gbáta nga gani he ya, ono gu ngba fu kurani.”—1 AKorindo 10:24.

Ka mo mbunga tiro kadu ni fudifudi ro ya. Gu kura bagude sa agumba gupai nga: “Ti kura aregbo ho awire naafura ni fere, mi nidu na kura dungu apai berãre yo mi naaberã kuriihe. Na awire naaino ho aino nga mi adeganga ture fuyo nzunzu te!”

Ka si dunga pai amangi ro wa gure, gupai si aida mo mangihe nga mo kisi TV na ki zogo agu ahe du bero dunduko ku sande singia afoni du. Mo moi berãro kurii gupai wiro agumbaha, na kini gbe berãro kuti gaani aberãpai ka si vura du nga agu apai ni apehe arunga te vurũ.

“Si naida ani kido awirani nga gayo aberãpai na nyanyakipaha furani. Ka si du nga i abingo ho wo te, i afuranga berewe na ani riipa gayo abipai te watadu i nikaa ndu fuo kura aboro tipa undo.”—Maranda.

“Ka mo zinginga ho wiro afura ni ya ka si vura du vurũ nga gau aberãpai arunga te.”—Anthony.

BANGUA RENGO NGA GA BAIBIRI: “Oni degeturoni wenengai.”—Ruka 8:18, NW.

Mo mangisunge na agu amamu nakura ho oni amangapai ni na yo. Ti kura aregbo si fu agude taata i nafura na avunguyo ho duhe nga i angeranga ngba bangiriyo na avunguyo te.

“Ani ni naamangasunge na gu mamu nakura ho ani naata ni na yo rogo arabia [tarambiri]. Ho ani asungo ni kina rogo gu paparaha sa kuba gupai nga kaa ngera ngba bangirani gipai re ima sa gupai nga ani du na wene fugo dagbase na yo.”—Nicole.

Regbo riahe nafu kura mamu nga gu ani ambakadanga tirani ambakada tipa ya.

“Ti regbo gu riahe nga ga nyemu, ani dunduko ni basasa naapeka pa gu gbegberẽ apai nimangi furani rogo gu uru re na gu bawene apai nimangi. Gipai re nakoda rani kina sa na si nasa rani nibasasa dunduko ani ini gupai nga anga si naida ani mangipai kuti agu akpakarapai namanga rani nisarani te.”—Robin.

BANGUA RENGO NGA GA BAIBIRI: “Aboro dunduko i ipisi tiyo ka gia pai, [na] ki rõasi tiyo tipa gumba pai.”—Yakoba 1:19.