PAR BUÑ NI MA NOʼ XIIN
5 Biiy diitz né xiinlo
¿XÍ RADUDYNI DIITZ?
Órni buñ rooy diitz né xiin ronyni que guiniʼbu ni ronybu pensary né mod rasacbu.
¿XIGONY RASACNI?
Rasac nagan buñ gooy diitz né xiin ni ma cayac mbioxhlas. Libro ni laa Tú no me escuchas, yo no te entiendo, rabexa ximod labúu guisac bixios mbiox. Buñ ni noʼ xiin diti nanyibu xi casaclóo xiinyibu, ndeʼ radudy diitz órni mbiox nac mitien guirá ni casaclobu raibybu láani bixiosbu o xinaʼbu. Per órni ma goniʼsyibu ma diti tampa rooyibu diitz né bixiosbu o xinaʼbu. Por ngú ma diti nanbu xi rony pensary xiimbu o mod rasacbu. Per órni mbiox diti ná gooy diitz né bixios o xinaʼ ór cu más caquiinyibu gooyibu diitz.
¿XÍ LABÚU GONYLO?
Goyoʼ xalagary xiinlo. Buny láani ná gooyto diitz ma goxin roʼ.
«Rioʼ ór nainy looy guiniʼlo: ¿Guidopy dzú goyoʼno toibsi né nigoreʼpa nainy looy guiniʼlo la? Per ¿xigony raniʼlo scá janlo xiinlo ná guiniʼ ni noʼ lainy xcalnabany la? ¿Xí diti ndeʼ ni racladxno guiráno ni ma noʼ xiinno la?» (Lisa).
«Rioladxi gaasi tempran, per más sacró rooya diitz né xiinna órni ma godudy galagueʼel» (Herbert).
NI NÁ LA BIBLIA: «Tigaaga buñ guiyopy mod gacné stoib buñ, né diti tzoʼbu galrrasaʼ por láasibu» (1 Corintios 10:24).
Diti gonylo pensary ló stoib cós. Toib buñ ni ma noʼ xiin ná: «Rioʼ ór, órni caniné ximbioxa naʼ más ló stoib cós roni pensary, né radudyibu cuent».
Pal ma gosaclolo ndeʼ, bisioʼy televisión né godix stoib lad tableta o celular xtunylo né bicadiagtzay ni cayaʼpy xiinlo looy. Modcu saslooylo que galrrasaʼ ni cadudybu, ná mitienni láaca rasacni par looy.
«Nigolú rasac que xiinno gan que rioʼno galrrasaʼ por mod rasacyibu. Pal digundi la, sayopybu galrracné stoib lad» (Maranda).
«Diti nimaca guidzuitzlo, pal xiinlo cuenunysi raniʼ» (Anthony).
NI NÁ LA BIBLIA: «Por ngú, colguicaatzay cuidad ximod racadiagto portín ni nap sacaʼ más, per ni diti nap siaʼaxni láabu dada ni ronybu pensary que napbu» (Lucas 8:18).
Biiy diitz né xiinlo ortísi. Rioʼ ór mbioxhlas rioladxyibu gooyibu diitz né bixiosbu o xinaʼbu órni ma casaladxyibu.
«Galán rooydo diitz né xiindo órni rioʼdo viaj. Más sacró rooydo diitz né layibu órni rabúdo cueʼpayibu xalagary cuudo nislóyibu» (Nicole).
Láaca galán rooy buñ diitz né xiin órni roʼ guet.
«Laʼga cayoxtzudo, guirádo ranido ximod goyeeni lóodo rodzu. Costumbre reʼ racnéni lóodo par diti guicalódo galnagan toibdo» (Robin).
NI NÁ LA BIBLIA: «Raquiin tzoʼto puext par guicadiagto, diti nimaca guiniʼto» (Santiago 1:19).
Sigory láaca sioladxlo ndeʼ
NI RASUIDY LA BIBLIA
Galrracné par mbioxhlasien né mbioxhlas
Bisuidy ximod labúu gacné la Biblia looy par labúu guicalólo galnagan guirá ór.
