KƐ HA FƆLI
6: Nyɛ Tsɔse Nyɛ Bimɛ Ɔmɛ
NƆ́ NƐ E TSƆƆ
Munyungu nɛ ji tsɔsemi ɔ sisi ji nɛ a ma kudɔ nɔ ko loo a maa tsɔɔ lɛ ní. Be komɛ ɔ, jã peemi biɔ nɛ a ma dla jokuɛ ko je mi bami. Behi fuu ɔ, e biɔ nɛ a tsɔse jokuɛ ɔ nɛ e nyɛ nɛ e mwɔ yi mi kpɔhi nɛ da ngɛ e si himi mi.
NƆ́ HE JE NƐ E HE HIA
Ligbi etɛ nɛ ɔ, fɔli fuu tsɔse we a bimɛ hu, ejakaa a ngɛ gbeye yee kaa tsɔsemi ɔ ma ha nɛ jokuɛwi ɔmɛ maa nu he kaa se nami be a he. Se fɔli nɛ a ngɛ nile ɔ woɔ mlaahi nɛ nile ngɛ mi, nɛ a tsɔseɔ a bimɛ ɔmɛ konɛ a kɛ jamɛ a mlaa amɛ nɛ tsu ní.
“E sa nɛ jokuɛwi nɛ a le níhi nɛ e sa nɛ a pee kɛ níhi nɛ e sɛ nɛ a pee, konɛ lɔ ɔ nɛ ye bua mɛ nɛ a wa nɛ a ba pee nikɔtɔma kpakpahi. Ke a tsɔse we jokuɛ ko ɔ, e ngɛ kaa mele nɛ nɔ́ ko kudɔɔ we lɛ, nɛ e maa laa loo e ma butu.”—Pamela.
NƆ́ NƐ O MA NYƐ MAA PEE
Ngɔɔ o nane kɛ ma si. Ke o bimɛ ɔmɛ kɛ mlaa nɛ o wo ɔ tsu we ní ɔ, moo gbla a tue. Jehanɛ ɔ se hu ɔ, ke a bu mo tue ɔ, mo je a yi.
“Bimɛ bui a fɔli ngɛ je nɛ wa ngɛ mi nɛ ɔ mi, enɛ ɔ he ɔ, ke ye bimɛ ɔmɛ bu mi tue ɔ, i jeɔ a yi. A yi nɛ i jeɔ ɔ ha nɛ e he wɛ ha mɛ kulaa kaa a maa kplɛɛ tsɔsemi nɔ.”—Christine.
BAIBLO SISI TOMI MLAA: “Nɔ́ fɛɛ nɔ́ nɛ nɔ ko ngɛ due ɔ, lɔ ɔ nɔuu nɛ e ma kpa.”—Galatia Bi 6:7.
Ngɔɔ hɛ si kami kɛ tsu ní. Moo da jeha nɛ jokuɛ ɔ ye kɛ nyɛmi nɛ e ngɛ ɔ nɔ nɛ o kɛ tsɔsemi nɛ sa nɛ ha lɛ. Ke ji kaa o da tɔmi nɛ jokuɛ ɔ tɔ̃ ɔ nɔ kɛ gbla e tue ɔ, e yeɔ manye. Kaa nɔ hyɛmi nɔ́ ɔ, ke o bi ɔ kɛ fon tsu we ní saminya a, o ma nyɛ maa ngɔ fon ɔ ngɛ e dɛ be bɔɔ. Jamɛ a be ɔ mi nɔuu ɔ, ke nɔ́ nɛ o bi ɔ pee ɔ tsa pi nɔ́ ko tsɔ ɔ, o mi mi ko fu ngɛ he.
“I bɔɔ mɔde kaa ma le ke ji kaa ye bi ɔ je blɔ nɛ e pee nɔ́ nɛ hí aloo e hɛ nɛ be e he nɔ nɛ e pee. Slɔɔto ngɛ nɔ́ ko nɛ hí nɛ jokuɛ ko pɔɔ peemi nɛ e sa nɛ a ha nɛ e kpa, kɛ tɔmi ko nɛ e pee nɛ e biɔ nɛ a tsɛ e tue se ngɛ he ɔ a kpɛti.”—Wendell.
BAIBLO SISI TOMI MLAA: “Nyɛ ko hi nyɛ bimɛ ɔmɛ a mi mi la woe, konɛ a kɔni mi nɛ ko jɔ̃.”—Kolose Bi 3:21.
Mo je suɔmi kpo. Ke jokuɛwi le kaa suɔmi nɛ a fɔli ngɛ kɛ ha mɛ ɔ he je nɛ a ngɛ mɛ tsɔsee ɔ, e yi ha mɛ kaa a maa kplɛɛ nɔ nɛ a kɛ tsu ní.
“Ke wa bi ɔ tɔ̃ ɔ, wa haa nɛ e leɔ kaa wa bua jɔ yi mi kpɔ kpakpahi nɛ e mwɔ be ko nɛ be ɔ he. Wa haa nɛ e leɔ kaa tɔmi ɔ tsɔɔ we kaa e hí, mohu ɔ, nɔ́ nɛ he hia ji kaa e maa ya nɔ nɛ e pee tsakemi nɛ sa, nɛ wɔ hu wa pee klaalo kaa wa maa ye bua lɛ.”—Daniel.
BAIBLO SISI TOMI MLAA: “Suɔmi toɔ e tsui si, nɛ e mi mi hi.”—1 Korinto Bi 13:4.
Eko ɔ, O Bua Maa Jɔ Enɛ ɔ Hu He
HWƆƆMI MƆ
Mɛni Blɔ Nɔ E Sa Kaa O Gu Kɛ Tsɔse O Bimɛ?
Baiblo ɔ tsɔɔ blɔ etɛ nɛ o maa gu nɔ kɛ tsɔse o bi saminya.
