PI JUNYODO
6: Twiny
THELEMBENE TIE ANG’O?
Wec ma nia twiny thelembene copo bedo nitelo wi ng’atini kunoke niponje. Saa moko enyutho nimiyo matira ni nyathin pi kosa m’etimo. Re wang’ ma pol eketho i iye niponjo nyathin ku ponji mi kurajo ma bikonye kara eng’ey nitimo ng’iyong’ic ma cuu.
PIRANG’O PIRE TIE TEK
Niai i kind oro moko m’ukadhu ceng’ini eni, dong’ jumiyo ngo twiny ni awiya i udi ma pol, pilembe junyodo gilworo nia lewic bimaru nyay i wi awiya ka gitwinyogi. Ento junyodo ma riek, giketho cik i kadhiri ma ber man giponjo awiya migi ku woro cikne.
“Mito awiya ging’ey mupaka migi kara gidong ni dhanu ma zoo. Ka twiny umbe, awiya gicopo bedo ve yei ma upolne mbe ma corere swa, kunoke ecopo mwony amwonya zoo de.”—Pamela.
ICOPO TIMO ANG’O?
Kud ilok yub m’imaku nyaswa swa. Ka nyathin peri uworo ngo cik m’iketho, mii ire matira. Ento saa ceke ma kan etimo lembe moko ma ber, bed ayika nifoye.
“Abed afoyo awiya para wang’ ma pol pi woro ma gibeyutho i ng’om maeni ma dhanu ma pol gitie wor ungo. Foyofoc maeno uketho kan ubekwayu nia amii igi twiny giyiyo yot yot.”—Christine.
CIK MIR UKUNGU MI BIBLIA: “Gin ma tek ng’atu moko ubecoyo, gica re m’ebikayu bende.”—Jugalatia 6:7.
Kud ibed ng’atu ma i lembe pare tek. Kinde m’ibemiyo twiny ni nyathin, kepar cuu pi oro pare, copo pare man kadhiri mi racu m’etimo. Twiny bedo ber ma gwey kan erombo ku racu ma jutimone. Ku lapor, ka gibeworo ngo cik m’iketho iwi ayi mi tiyo ku telefon, irom maye cen kunoke iromo ketho mupaka m’itiyo kude. I saa ma rom eno, kud iwek ng’eicwiny umeki i kum lembe moko ma kabang’e mbe pilembe nia eton i ii.
“Atimo kero ning’eyo ka nyo nyathin para utimo kosa akakaka kunoke nyo lembene uvuth avutha ire. Tung’ tung’ utie i kind kosa ma lee ma ng’atini betimo nja man m’ukwayu jutwiny kokoro, ku kosa m’uvuth avutha m’ukwayu junyuth anyutha kende ni ng’atini.”—Wendell.
CIK MIR UKUNGU MI BIBLIA: “Kud wubed wunyay ng’eicwiny i awiya mwu kara can kud umond i igi.”—Jukolosai 3:21; korolembe mi there.
Bed ku mer. Awiya giyiyo ponji man gitiyo kude yot yot ka ging’eyo nia mer re m’ubecwalu junyodo migi nitwinyogi.
“Kinde ma wodwa utimo kosa, wanyutho ire nia wabino kud anyong’a lee pi yub ceke ma beco m’egam emaku i nindo m’ukadhu. Wakoro bende ire nia kosa romo cido ngo nyinge tekene etimo alokaloka m’ukwayere, man nia wan de watiye pi nikonye kara etim alokalokane.”—Daniel.
CIK MIR UKUNGU MI BIBLIA: “Mer ciro lembe hai man ebedo ber ku dhanu.”—1 Jukorintho 13:4.
