PU CHAU CA PU ÑUQUENGEALU
6. Norümfinge
¿CHEM AM CHI?
Pu chau mülei ñi quimeltual tañi pu yall, pu püñeñ ñi quelluafiel ca ngülamtuafiel quisu tañi huesa femün. Tañi femngechi femal, duamfalngei ñi quimeltuafiel tañi pu pichiqueche, femngechi tañi cüme dullial engün.
¿CHUMNGELU FENTE FALIN-NGEI?
Famülque mu, pu chau ngülamtuhuelai tañi pu yall, fei ñi huesa duamelnoafiel. Huelu pu cümeque chau ca ñuque eluquefi cümeque ngülam, fei ñi norümtuafiel engün.
Pamela feipi: “Pu püñeñ duamniei cümeque ngülam ñi chem chumal engün, femngechi nor chengerpuaingün. Quimeltunofiliyiñ engün, quiñe farcu nienolu timon reque feleaingün. Müchaique cañpüle miyauquei chi farcu, feimu ñamnagi co meu”.
¿CHEM CHUMAFUIMI?
Ngülamtufilmi, huechutripape tami feipin. Tami pu yall, pu püñeñ feyentunole, feipicünuafimi tañi huesa rupayal. Doi mai feyentule, saquiafimi.
Christine feipi: “Famülque mu, pu püñeñ müte feyentuquelai tañi pu chau. Feimu iñche saquiquefiñ tañi pu püñeñ feyentulu engün. Femngechi norümtufili engün, cüme llouquei ti ngülam”.
BIBLIA ÑI NGÜLAM: “Chem ñi nganel quiñe che, fei ta cosechayai” (Gálatas 6:7).
Cüme raquiduamnge. Norümtufilmi tami pu yall pu püñeñ, hune ngüneduamnge tunten tripantu ñi nieel, tañi quimün ca tunte tañi huesa femün. Tami pu yall pu püñeñ huesa femle, norümtuafimi ñi cüme elcünutual tañi huesa femün. Quiñe ejemplo, tami yall yamnofile tami ngülamtufiel chumngechi ñi püneafiel chi celular, catrüntucuafuimi tañi püneafiel. Huelu loncontucunieaimi: pichi huelulcale engün, rume illculayaimi.
Wendell feipi: “Petu tañi norümtunon tañi fotüm, hune ramtuuquen: ‘Tañi fotüm, ¿rüf ayüfui ñi huesa femal? Cam, ¿ngüneduamlai rume ñi huelulcan?’. Quiñe fotüm ngüneduamnolu ñi huesa femün trürlai ta quiñe fotüm müchaique femquelu ñi huesa femün”.
BIBLIA ÑI NGÜLAM: “Pu chau, huesa duamel-layafimün tamün pu yall, femngechi ñi cutrantupiuquenoal engün” (Colosenses 3:21).
Poyenchefengeaimi. Poyen mu norümtufilmi tami pichiqueche, doi eluucüleafuingün ñi inayal tami ngülam.
Daniel feipi: “Tañi fotüm huelulcaulu, feipiquefiyu: ‘Cüme fotümngeimi. Feimu cüme elcünutulmi tami huelulcan, rulpacünungeai. Piuqueyehuiyiñ, iñchiu ta quelluhuayiñ’ piquefiyu”.
BIBLIA ÑI NGÜLAM: “Ti piuqueyechequelu ñom chengei ca cüme piuquengei” (1 Corintios 13:4).
