INYU BAGWAL
6: Bikodlene
KII HALA A NKOBLA
Ini buk le bikodlene i nkobla le éga tole niiga. Ngim mangéda, i nla ki kobla le i kodol mañge inyu jam libe a mboñ. Hala a nkobla ki le, u hôla mañge i yi kii i yé loñge ni kii i yé béba, i nya i yé le a pam i yoñ makidik malam ni nyemede.
INYUKI HALA A YÉ NSEÑ
Hala a yé ngandak nwii nano le, ngim mahaa i ngwés ha bé ki kodol bon, inyule bagwal ba, ba nkon woñi le i kodol mañge i nla ham nye tole yumus nye. Ndi bagwal ba ba gwé pék ba ntééne bon bap mambén ma ma kôli ni bo, ba nhôla ki bo i nôñôl mo.
“Boñge ba gwé ngôñ le ba tééne bo ngim minwaa, mi mi ga hôla bo i yila minhôôlak mi bôt mi mi nyi yoñ makidik malam. Mañge nu ba nkodol bé, a yé kiki sitima i i gwé bé lugul—ibabé nkaa i ga nimil, tole i ga kôp.”—Paméla.
JAM U NLA BOÑ
Yônôs yom u mbôn. Ibale mañge a ndogbene mambén moñ, kogse nye. Ndi bégés mañge nu a nôgôl mambén.
“Tolakii manôgla ma ntôl bé munu nkoñ isi unu, me mbéna bégés bon bem inyu manôgla map. Ibale u mbégés mañge, hala a mboñ le a hoo nok bikodlene i ngéda a mboñ jam li li ta bé lilam.”—Kristin.
LITIÑ LI BIBEL: “Jam mut a nsal, jo ki jon a’ bumbul.”—Galatia 6:7.
Nok libak li bon boñ. Ibale u nkodol man woñ, hala a nlama kiha ni nwii nwé, ngap yé, inoñnaga ki ni i béba jam a mboñ. I mbéda le kogse i kiha ni i béba mañge a mboñ—kiki hihéga, ibale man woñ a mbep gwélél téléfôn yé, tééne nye minwaa mu ligwéélak jé li téléfôn inyu ngim ngéda. Ndi i nlélém ngéda, keñgle ngandak hiun inyu hiki hisii jam.
“Me noode tibil wan inyu yi too man wem a nkôôba ndogop, tole a nhôs inyule a yik bé. Maselna ma yé ipôla ngim libak i ba nlama sas, ni hihôha hi ba nlama ndik le ba yis nye.”—Wendell.
LITIÑ LI BIBEL: “Ni unbaha bañ bon banan, miñem mi tiga hoi bo.”—Kôlôsé 3:21.
Bana gwéha. Ngéda boñge ba nyi le gwéha yon i ntinde bagwal bap i kodol bo, hala a ntômbôl bo i emble ni i nôgôl maéba ba nti bo.
“Ngéda man wés a mboñ béba, di yé di kal nye le di yé maséé ni makidik a bi yoñ dilo di bi tagbe. Di yé di toñle ki nye le hihôha a bi boñ, hi nla bé ôbôs jôl jé lilam ibale a ntibil sañgal mam, ni le di nla hôla nye i boñ hala.”—Daniel.
LITIÑ LI BIBEL: “Gwéha i nwéha ngut, i gwé ki loñge ñem.”—1 Korintô 13:4.
