N’a fɔra ko kololi, o kɔrɔ bɛ se ka kɛ mɔgɔ ɲɛminɛli walima a kalanni ye. Tuma dɔw la, a kɔrɔ ye fana ka den jogojuguw bɔ a la. Nka a kun fɔlɔ yɛrɛ ye min ye, o ye ka den kalan jogoɲumanya la walasa k’a dege sugandili ɲumanw kɛli la.

Sisan, an b’a jateminɛ ko bangebaaw dɔw tɛ son bilen ten ka u denw kolo bawo u fɛ ko u den bɛ min miiri a yɛrɛ ko la, ko kololi bɛ o tiɲɛ. Nka bangebaa hakilimaw bɛ dan bɛrɛbɛnnenw sigi u ka so ani ka u denw dege o danw batoli la.

“Denmisɛnnin mago bɛ a bangebaaw ka danw sigi so kɔnɔ walasa a ka kɛ baliku basigilen ye. Ni denmisɛnnin ma kolo, a bɛ kɛ i b’a fɔ bato dɔ ɲɛminɛlan tɛ min na min laban bɛ sira bila walima ka firi.”—Pamela.

I mana min fɔ, o bɔ a sira fɛ. I ye dan minnu sigi, ni i den ma olu bato, a ɲangi. Nka ni a ye o dan ninnu bato, kana ɲinɛ ka a fo o la.

“Ne bɛ n’denw fo tuma bɛɛ u ka kanminɛli la bawo nin diɲɛ in kɔnɔ mɔgɔ caman tɛ kanminɛli kɛ. Ka denmisɛnninw fo u ka kanminɛli la, o b’a to u bɛ sɔn kololi ma ni u ka kan ni o ye.”—Christine.

BIBULU SARIYAKOLO: “Mɔgɔ mana fɛn o fɛn dan, a bɛ o de suman tigɛ.”—Galasikaw 6:7.

Ni i bɛ den kolo, a kɛ cogo bɛrɛbɛnnen na. Kololi ka kan ka kɛ ka kɛɲɛ ni den si ani a ka kow faamuya cogo ye nka a ka kan ka kɛ ka kɛɲɛ ni a ka kɛwale juguya fana ye. Den bɛ nafa sɔrɔ ɲangili la, n’i ye a ɲangi ka kɛɲɛ ni a ka kojugu kɛlɛn ye—misali la, ni a ye kojugu kɛ ni telefɔni ye, i bɛ se ka a minɛ a la waatinin kɔnɔ. Nka i kana ko fitiniw yɛlɛma ka kɛ kojugubaw ye.

“Ni ne den ye fɛn dɔ kɛ, ne b’a ɲini k’a dɔn fɔlɔ ni a y’a dabɔ a kama de walima ni a filila de. Ni jogo kolon dɔ bɛ i den na min ka kan ka bɔ a la, ani ni a ye fili dɔ kɛ min ka kan ka jira a la, o kow tɛ kelen ye.”—Wendell.

BIBULU SARIYAKOLO: “Aw kana digi aw denw la, walisa u dusu kana tiɲɛ.”—Kolosekaw 3:21.

I denw kanu. Denmisɛnninw ka telin ka sɔn u bangebaaw ka kololi ma ani ka u ka kuma bato ni u b’a dɔn ko kanuya de bɛ u bangebaaw bila ka u kolo.

“Ni an den tun ye filimankow kɛ, walasa ka a hakili sigi, an tun bɛ a fɔ a ɲɛna ko a ye latigɛli ɲuman minnu kɛ ka tɛmɛn, ko olu bɛ an nisɔndiya. An tun bɛ a ɲɛfɔ a ye ko ni a tora ka ta’a fɛ ka a ka filiw ladilan, ko olu tɛna nɔ bila a tɔgɔ kan wa ko an bɛna kɛ a fɛ, ka a dɛmɛ tuma bɛɛ.”—Daniel.

BIBULU SARIYAKOLO: “Muɲuli bɛ kanuya la, a falen bɛ ɲumaya la.”—1 Kɔrɛntekaw 13:4.