BANI NAMATORAS
6: Pangajaran
AHA DO ARTINI
Pangajaran boi mangartihon ojur-ojur atap podah. Tarmasuk do homa ai pinsang-pinsang sanggah niombah mangkorjahon na lepak. Jadi, pangajaran na humbani namatoras mangurupi niombah ase boi mambahen haputusan na dear i lobei ni ari.
MASE PONTING ON
Piga-piga tahun na parpudi on lang sai idalankon namatoras be pangajaran hubani niombahni halani mabiar sidea anggo ipinsang, holi gabe maretek ni uhur niombahni. Tapi sasintongni porlu do ibahen sidea aturan na masuk akal anjaha mangurupi niombahni laho mandalankon ai.
“Ase boi holi sidea gabe halak na martanggung jawab, porlu do ibotoh niombah aha na boi ihorjahon atap na lang. Anggo lang adong pangajaran, sahalak niombah boi ma songon kapal na lang dong kemudini. Ujungni kapal ai boi gabe kahou atap manongnong.”—Si Pamela.
NA BOI IBAHEN NASIAM
Ulang mubah-ubah. Anggo lang idalankon niombahmu aturan na ibahen ham, maningon ibere ham ma hukuman. Tapi anggo dear do idalankon ia aturan ai, maningon ibere ham ma homa pujian.
“Sonari on, bahat halak lang ra unduk bani aturan. Tapi anggo ahu sai hupuji do niombahku halani ra sidea unduk bani aturan. Halani ra hita mamuji lambin urah ma sidea manjalo pinsang-pinsang”—Si Christine.
BIBEL MANGKATAHON: “Ai ia in itidahkon halak, ai do sabionni.”—Galatia 6:7.
Masuk akal ma. Pasosok ma pangajaranmu hubani umur, pangarusion, ampa hasalahan na ibahen niombahmu. Ulang pabanggal-banggal hasalahan na etek. Ambahni ai, maningon sosok do hukuman na ibahen hita pakon hasalahan na ibahen ia. Umpamani, anggo isalah gunahon ia HP-ni, ulang bere ia mamakei HP piga-piga dokah.
“Sanggah niombahku mangkorjahon na salah, marusaha do ahu laho mambotoh hasalahan ai isangaja atap lang. Anggo marulak-ulak ihorjahon ia hasalahan na sarupa legan do pangajaranni pakon hasalahan na lang isangaja.”—Si Wendell.
BIBEL MANGKATAHON: “Ulang ma makorastu nasiam dompak niombah nasiam, ase ulang mandolei sidea.”—Kolosse 3:21.
Patuduh ma holong. Lambin urah do niombah manjalo ampa mandalankon pangajaran anggo ibotoh sidea halani holong ni namatorasni do ase ibahen aturan ai.
“Sanggah niombahnami mambahen hasalahan, na parlobei ipuji hanami do parlahouni na madear anjaha bangga do hanami ijai. Ipatugah hanami do homa hassi pe ongga ia mambahen hasalahan, boi do ia gabe halak na lambin dear anggo ra ia ipinsang. Anjaha sirsir do hanami mangurupi.”—Si Daniel.
BIBEL MANGKATAHON: “Na sabar do haholongon in anjaha na basar.”—1 Korint 13:4.
