Ladundehóun isaani luma larufudahóun lun mini lubéi ererehóuni ani anihein dan, mini lan háfaagun agübürigu lun híderaguniña hasaanigu lun hígiruni igaburi le mabuidunbei. Ani liibe-agei dan, mini lan larufudahóun igaburi houn le lunbei líderaguniña anúadira buidu.

Lidan burí irumu le sügühalibei, gíbeeña agübürigu mererehantiña houn hasaanigu ladüga hanufude hamá hadügün lau lira lun heferidiruni hasaanigu ínsiñeni le hasandirubei hawougua. Lau sun lira, añahein agübürigu buítiña ha íchugubaña lúrudu houn hasaanigu ani arufudaha hamuti houn ida luba lan hafalaruni.

“Lun haweinamudun isaanigu kei gürigia buítiña, mégeitiña hasubudiruni lébeha le gayaraabei hadügüni. Anhein masuseredun ítara, ítara haba kei aban waporu to gayaraaboun tadibiragun ladüga ua lan simunu tuagu: lachülürüba dan lun wuriba lan lidin houn ladüga mafurendeirun hamá anúadira buidu” (Pamela).

Gúnfuli humá lau le hariñagubei. Anhein maganbadi hisaani hun, arufuda huméi lun alubaha lani gürigia le lábunubei. Ánheinti gaganbadi hun, ariñaga huméi lun buidu lan ladüga.

“Kei maganbadi hamá hiibe-agei gürigia uguñe weyu, súnwandan nariñagun houn nisaanigu buidu lan hadüga dan le gaganbadi hamá. Ítarati, ménrenguntimati houn lun hánharun lun ererehóuni dan le hemegeiruni” (Christine).

ADUNDEHANI TÍDANGIÑETI BÍBÜLIA: “Le lábunagubei gürigia, ligíaba giñe lalubaha” (Galasiana 6:7).

Aranseñu humá lun hadügün asansiruni. Danme hererehan lun hisaani, gabaroun huméi lirumudiri, le gunfuranda lubéi luma lueirin lichara. Liibe-agei dan, barütimati ererehóuni buiti dan le úara lan luma luwuyeri charati le adügǘbei. Kéiburi hamuga dan le mafalarun lani hisaani lúrudu luáguti layusurún gágamuru, háfuga gayara lan hariñagun lun siñabei lan layusuruni luagu átiri dan. Ani áfaagua humá lun maweirin lan hagañidun luagu aban liraüraü turobuli.

“Súnwandan náfaagun lun nasubudiruni anhein lau lubéi lichú lau nisaani maganbadi lan nun o ladüga lan bulíeiguarügü lan. Mama ligiaméme nererehan lun nisaani luagu somu luriban igaburi le larufudubei lumoun níderaguni gunfurandei adügaali lan aban charati” (Wendell).

ADUNDEHANI TÍDANGIÑETI BÍBÜLIA: “Másügüraguala hagumadiruniña hisaanigu, ragühañein maguraasuni” (Kolosana 3:21).

Arufuda humá ínsiñeni. Anhaün erereha houn hisaanigu lau ínsiñeni, híchuguba hisaanigu fe ani ménrenguntimabei houn lun hánharun lun ererehóuni luma hafurendeirun lídangiñe hachara.

“Dan meha le ladügün wasaani aban charati, súnwandan meha wariñaguni lun gunda wamá lau sun katei buiti le adüga láalibei darí oura ligía. Ariñaga wagía lun anhein lan ladüga asansiruni le mégeiwabei, madügünbei lan charati le ladügübei lun wuriba lan layanuhóun luagu lun sun libagari ani wíderagubei lan” (Daniel).

ADUNDEHANI TÍDANGIÑETI BÍBÜLIA: “Le hínsiñehabubei gaguraasunti, areidati” (1 Korintuna 13:4).