CHKË RI TEʼEJ TATAʼAJ
6. Keʼaqʼlaʼ awalkʼwal
¿ACHKË NTEL CHË TZIJ?
Yeʼaqʼïl awalkʼwal ntel chë tzij yeʼatjoj, y kʼo mul, yeʼaqʼïl taq kʼo jun ma ütz ta nkiʼän. Chqä, yetjöx rchë ütz kinaʼoj nkiʼän y rchë yë ri ütz nkichaʼ nkiʼän pa kikʼaslemal, ke riʼ ma yesach ta.
¿ACHKË RMA KAN KOWAN NKʼATZIN RE NAOJ REʼ?
Chpan ri junaʼ ri ye qʼaxnäq pä, ye kʼïy teʼej tataʼaj ma yekiqʼïl ta chik kalkʼwal rma nkiquʼ chë ri kalkʼwal xa xkebʼison. Ye kʼa, ri utziläj teʼej tataʼaj kʼo yekiqʼät chkiwäch kalkʼwal chqä nkikʼüt chkiwäch achkë rubʼanik nkinmaj tzij.
«Ri akʼalaʼ kʼo nkʼatzin nqʼat chkiwäch rma taq xkekʼïy qʼanäj xkerutoʼ rchë yë ri ütz xtkichaʼ xtkiʼän. We ma nqaʼän ta riʼ, ryeʼ xa achiʼel ta xkeʼok jun barco ri majun ta ru-timón» (Pamela).
¿ACHKË ÜTZ NAʼÄN?
Ma tajäl ta ri naʼoj nayaʼ chkë awalkʼwal. We ri awalkʼwal ma nunmaj ta atzij, takʼutuʼ chwäch chë ri nuchaʼ nuʼän kʼo ütz o ma ütz ta xtkʼäm pä chrij. Ye kʼa, taq ryä nunmaj atzij, taʼij che rä chë kan kiʼ akʼuʼx rkʼë.
«Rma komä ri akʼalaʼ ma yenman ta chik tzij, ronojel mul nbʼij chkë wal chë kan ütz xkiʼän rma xkinmaj ntzij. Rma nbʼan riʼ ma kʼayewal ta nuʼän chkiwäch ryeʼ nkinmaj ntzij taq yenqʼïl» (Christine).
RI NAʼOJ NUYAʼ LE BIBLIA: «Ri achkë nutïk qa jun winäq, kan ya riʼ ruwäch xtresaj» (Gálatas 6:7).
Taquʼ kij ri awalkʼwal taq yeʼaʼqʼïl. Taq naqʼïl jun awalkʼwal, tatzʼetaʼ na jaruʼ rujunaʼ, achkë nkowin nuʼän y achkë mak xuʼän. Ri teʼej tataʼaj yekiqʼïl kalkʼwal taq kʼo jun ma ütz ta nkiʼän. Jun tzʼetbʼäl, we ri awalkʼwal ma nkinmaj ta tzij chrij ri kiksaxik ri celulares, ütz nanmaj chkë o naʼij chkë chë ajlan horas tkiksaj. Ye kʼa, ma taʼän ta nüm che rä jun ti koʼöl kʼayewal.
«Ntäj nqʼij rchë ntzʼët we ri walkʼwal kan chubʼanik xuʼän jun rumak o xa xsach. Ma junan ta naqʼïl jun awalkʼwal taq itzel runaʼoj chwäch ri nakʼüt chwäch chë xsach rkʼë ri xuʼän» (Wendell).
RI NAʼOJ NUYAʼ LE BIBLIA: «Ma tiyäk ta kiyowal iwalkʼwal, rchë ke riʼ ryeʼ ma xkebʼison ta» (Colosenses 3:21).
Ütz anaʼoj tabʼanaʼ. We ütz anaʼoj naʼän taq yeʼaqʼil awalkʼwal, ryeʼ xtkitzʼët riʼ y ma kʼayewal ta xtuʼän chkiwäch xtkinmaj atzij chqä ma xtkiʼän ta chik ri ma ütz ta xkiʼän.
«Taq ri qalkʼwal kʼo jun akuchï nsach wä, ronojel mul nqaʼij wä che rä chë kan ütz rubʼanon pä pa rukʼaslemal. Nqaʼij wä che rä chë ma xttoʼon ta ran we xtyaʼ qa rubʼanik ri xuʼän chqä chë röj nqajoʼ nqatoʼ» (Daniel).
RI NAʼOJ NUYAʼ LE BIBLIA: «Ri winäq ri najowan nkochʼon chqä ütz runaʼoj» (1 Corintios 13:4).
