NULEPA CAAH
6: Chimhhrinhnak
A SULLAM
Chimhhrinhnak timi cu lamhruai asiloah cawnpiak timi sullam a ngei. A caan ah fale i a ṭha lomi an tuahsernak remhpiak zong aa tel. Cun a ṭhami ziaza ngeih dingin cawnpiak zong aa tel.
ZEICAH A BIAPIT
Nai kumhrabu chungah chungkhar cheukhat ahcun chimhhrinhnak a um lo ti awk tluk a si, mah cu nulepa nih an fale mahle mah zumhnak an ngeihmi a tlau sual lai ti an phan caah a si. Asinain a fimmi nulepa nih cun fale caah aa tlakmi phunglam an serpiak hna i mah kha zulh awkah an cawnpiak hna.
“Ziaza ṭha a ngeimi upa pakhat in an ṭhan khawh nakhnga dingrep serpiak an hau. Chimhhrinh a si lomi fale cu a zahnak thingtlep a um lomi tilawng bantuk an si, mah lawng cu a duhnak paohah a phan lai i a donghnak ah a rawk kho.”—Pamela.
TUAH KHAWHMI
Na chim ningin tuah. Fale nih nan sermi phunglam an zulh lo tikah dantat hna u. Cun an zulh tikah thangṭhat hna u.
“Nawlngaih lonak in a khatmi hi vawlei ah ka fale nih nawl an ngaih caah ka thangṭhat tawn hna. Thangṭhat an simi nih a herhmi chimhhrinhnak kha cohlan awkah a fawiter deuh.”—Christine.
BAIBAL PHUNGLAM: “Mi nih a tuhmi cu a zun ko lai.”—Galati 6:7.
A tlarimi si. Na chimhhrinh hna tikah na fale i an kum, an thil ti khawhnak le an palhnak zeitluk in dah a ngan ti kha tuak. An palhnak he aa tlaimi dantatnak pek ah hmual a ngei tawn. Tahchunhnak ah, ningcang loin phone a hman ahcun caan caankhat chung phone kha hmanter hlah. Asinain thil hmete kha thil nganpi ah canter hlah.
“Ka fa nih hramhram in nawl a ngaih lomi maw a si asiloah a tuah sualmi dah a si ti kha hngalh awkah kaa zuam. A hram in phawi a haumi ziaza ṭhalo a um bantukin hngalhternak men in a zami palhnak zong a um.”—Wendell.
BAIBAL PHUNGLAM: “Nan fale kha an ing puanter hna hlah u, an hnabei a dong sual lai.”—Kolose 3:21.
Dawtnak ngei u. Nulepa nih an kan chimhhrinhmi cu an kan dawt caah a si ti kha fale nih an hngalh ahcun cohlan awkah a fawi deuh.
“Kan fapa nih palhnak a tuah tikah a hlan i a ṭhami biakhiahnak a rak tuahmi cungah kan i uanthlarnak kong kha kan chimh. A herhmi thlennak tuah awkah a tlai tuk rih lo i cutin tuah khawh awkah kan in bawmh lai tiah kan ti.”—Daniel.
BAIBAL PHUNGLAM: “Dawtnak cu thlachiat a ruat i mi cungah zaangfahnak a ngei.”—1 Korin 13:4.
