YIBARIRAITA
6 Kʼẽãbe kʼawuaibara
¿KʼÃRẼTA OIBARA?
Edaude warraraba nemitia obʉ kʼarea kʼẽãibara, jaradiaibara. Warrarata nekʼãrẽ bia jaradiabara ãya kʼawuadamarẽã sãwũã bia krĩchaita.
¿KʼÃRẼA YIBIA?
Yibarirabara idi ewadera ãyi warrarãra kʼẽã ẽ, ãyita perabʉ baera yi warrara waribʉrʉza zeri ẽ kĩrãkʼa bʼaita krĩchai baera. Mamina yibarira biabara jaradiabʉ kʼãrẽta oibarata akʉza jaradiabʉ ũrĩ kʼawuaibarata.
«Warrarabara kʼawuaibara kʼãrẽta oibarata, mawũã ãyi waribʉrʉde ẽbẽra bia bamarẽã. Maʉ̃ta oẽbʉrʉ warrarãra jãba iyidoba abibari kĩrãkʼa bayi, maʉ̃ta wiña wiñane jĩga wãseabʉ maʉ̃ba bia wã ẽ bayi» (Pamela).
¿KʼÃRẼTA OSEABɄ?
Bʉa jaradara oibara. Bʉ warrara jarada bʉ bedʼeata ũrĩ ẽ bʉrʉ kʼẽãita mamina ũrĩbʉbʉrʉ biga diaita maʉ̃ kʼarea.
«Idi ewadera warrarabara jipa ũrĩkĩrã ẽ, maʉ̃ kʼarea mʉ̃ warraraba mʉ̃ bedʼea ũrĩbʉbʉrʉdera mʉ̃ara biga diabʉ ãyaʼa. Mawũã ãyitara zarea ẽ bayi mʉ̃a kʼẽãbʉrʉdera» (Christine).
DAIZEZE BEDʼEABA JARABɄTA: «Nekʼãrẽ yumakẽrãba ubʉra akʉza maʉ̃ta jẽda jʉrepeyi» (Gálatas 6:7).
Bia krĩchara. Bʉ warrara kʼẽãbei nãã, krĩchaibara kʼãrẽ poaga babʉta, kʼãrẽta oseabʉta akʉza iya odata kʼãrẽaba nekayiruabasita. Bia kʼẽãita, kʼẽãibara waña ãya nemitia obʉrʉde. Bʉ warraraba ũrĩ ẽ bʉrʉ selular kʼãrẽ ũmadaʉbabayeda zokʼaibarata, bʉa jaraibara kʼãrẽ oita, bʉa jãrĩseabʉ ewari biobayeda.
«Mʉ̃a zarea obʉ kʼawuaita mʉ̃ warraraba mʉ̃ bedʼea ũrĩ ẽãne, krĩña obʉta mawũã ẽ bʉrʉ krĩña oẽãta. Bʉ warrara bʉa kʼẽãbʉrʉde ãya nemitia krĩña oda kʼarea awuarabʉ bʉa ũrãgʼa diabʉde iya krĩña oẽ bada kʼarea» (Wendell).
DAIZEZE BEDʼEABA JARABɄTA: «Zezera mara wũãwũãra kĩrʉbiraidua ãyi so ãrĩ ẽ marẽã» (Colosenses 3:21).
Kãgata ũdubira. Bʉa bʉ warrara kʼẽãbʉrʉde kãgata ũdubibʉbʉrʉ, mawũãra bʉ warraraitara zare ẽ bayi bʉ bedʼea ũrĩta akʉza mawũã kʼawuayi wua oẽ baita.
«Daiba dai warraraba nemitia obaside, ãyaʼa jara ũrĩbibasi maʉ̃ta waña ara obasibʉrʉ ãyira ewari jõmaʉ̃nẽ sobia baseabasita akʉza jarapanasi daira sobiapanasita ãya nebia obʉ kʼarea. Adewara jarapanasi daira ãyi kʼawa bʼaita kʼarebaita, maʉ̃ba kʼarebabʉ warrarãra daucha bamarẽã» (Daniel).
DAIZEZE BEDʼEABA JARABɄTA: «Kãgara zʉbʉriabʉ akʉza krĩchabʉ awuru bia oita» (1 Corintios 13:4).
