Cheʼ mi lac ticʼ jiñi la calobilob, yom i yʌl chaʼan mi caj lac pʌsbeñob jiñi wem bʌ bij, miʼ caj laj cʌntesañob, i an i tajol yom mi lac tojʼesañob cheʼ an chuqui mach weñic miʼ melob. Pero cheʼ jaʼel, lʌcʼʌ tiʼ pejtelel ora yom mi lac pʌsbeñob wem bʌ melbal tac chaʼan wen chuqui miʼ yajcañob i mel i maʼañic miʼ melob mach bʌ weñic.

Jiñi jabil tac ñumen bʌ tilel, an tatʌl ñaʼʌlob maʼañix bʌ miʼ ticʼob jiñi i yalobilob come miʼ bʌcʼñañob chaʼan mi tsiʼ meleyob bajcheʼ jiñi, maʼañic i cʼʌjñibal miʼ yubiñob i bʌ i yalobilob. Pero jiñi wem bʌ tatʌl ñaʼʌlob miʼ subeñob i yalobilob chuqui yom bʌ yicʼot mach bʌ yomic miʼ melob, i miʼ cʌntesañob chaʼan miʼ jacʼob tʼan.

«Jiñi la calobilob yomʌch miʼ ñaʼtañob chuqui tac miʼ mejlel i melob yic’ot jiñi maʼañic bʌ chaʼan miʼ sujtelob ti wem bʌ quixtañu yicʼot chaʼan maʼañic miʼ ñumelob ti pʼis. Mi maʼañic miʼ ñaʼtañob, lajalob bajcheʼ juncojt barco maʼañic bʌ i volantejlel, mach la cujilic jala mi caj i sʌtob i bijlel, i mi caj i tajob wocol» (Pamela).

Mele cheʼ bajcheʼ tsaʼ wʌlʌ. Mi jiñi a walobil maʼañic miʼ jacʼ a tʼan, aqʼuen i qʼuel chaʼan jiñi muʼ bʌ i mel añʌch i wocolel. Mi mucʼʌch i chʼujbin a tʼan suben chaʼan weñʌch bajcheʼ jiñi.

«Come ili ora jiñi xcolelob maʼañix miʼ jacʼbeñob i tʼan i tat i ñaʼ, cheʼ bʌ jiñi calobilob mucʼʌch i jacʼbeñoñob c tʼan mic chʌcʌ subeñob chaʼan weñʌch bajcheʼ jiñi. Cheʼ bajcheʼ jiñi mach wen wocolic miʼ yubiñob chaʼan miʼ jacʼob jiñi i tijqʼuel» (Christine).

PRINCIPIO AM BɅ TI BIBLIA: «Come jiñʌch mi caj lac lotben i wut jiñi woli bʌ lac pʌcʼ» (Gálatas 6:7).

Chʼʌmbeñob i sujm. Cheʼ bʌ mi caj a ticʼ a walobil, chʼʌmʌ ti ñuc i jabilel, chuqui yujil, i mi añʌch i wocolel tsaʼ bʌ i mele. Ñumen wen cheʼ mi lac ticʼ jiñi la calobilob cheʼ bʌ tsaʼʌch i meleyob mach bʌ weñic. Jumpʼejl ejemplo, mi jiñi a walobil maʼañic miʼ jacʼ chuqui tsaʼ sube chaʼan jiñi celular, tajol miʼ mejlel a suben chaʼan ti chaʼpʼej uxpʼejl qʼuin an jach bajcheʼ mi caj i mejlel i cʼʌn jiñi i celular. Pero chaʼlen wersa chaʼan maʼañic maʼ colemtesan jiñi alʌ wocol tac.

«Tiʼ pejtelel ora mic ñop j qʼuel mi jiñi calobil yilol jach i chaʼan cheʼ bʌ tsiʼ ñusʌbeyon tʼan o tsaʼ jach ñajʌyi. Mach lajalic cheʼ mi lac tojʼesan jiñi mach bʌ weñic i melbal i cheʼ bʌ mi laj coltan i chʼʌmben i sujm chaʼan mach weñic jiñi tsaʼ bʌ i mele» (William).

PRINCIPIO AM BɅ TI BIBLIA: «Tatʌlob, mach laʼ techben i michʼajel laʼ walobilob, chaʼan maʼañic miʼ yubiñob i chʼijyemlel» (Colosenses 3:21).

Pʌsʌ chaʼan maʼ cʼuxbiñob. Mi wen jach bajcheʼ maʼ ticʼ jiñi a walobilob, mi caj i qʼuelob, i mach wocolic mi caj i yubiñob chaʼan miʼ jacʼob i tijqʼuel i mi caj i cʌñob chaʼan mach yomic miʼ melob mach bʌ weñic.

«Cheʼ bʌ jiñi lon calobil miʼ mel mach bʌ weñic i mi lon c suben, tiʼ pejtelel ora mi lon c suben jaʼel chaʼan tijicña mi cubin lon c bʌ cheʼ añʌch i jacʼʌ lon c tʼan i cheʼ añʌch i mele chuqui wem bʌ. Mi lon c suben chaʼan jiñi tsaʼ bʌ i mele mucʼʌch i mejlel i tojʼesan yicʼot chaʼan joñon lojon mi caj lon j coltan» (Daniel).

PRINCIPIO AM BɅ TI BIBLIA: «Jiñi am bʌ i cʼuxbiya yujil pijt yicʼot an i yutslel» (1 Corintios 13:4).