Abaanyɛ atsɔɔ wiemɔ ni ji tsɔsemɔ lɛ shishi akɛ, ni atsɔɔ mɔ ko gbɛ loo atsɔɔ lɛ nii. Bei komɛi lɛ, etsɔɔ hu akɛ ajaje gbekɛ yɛ nɔ ko ni efee ni ehiii lɛ he. Shi bei pii lɛ, enɛ biɔ ni atsɔɔ gbekɛ lɛ bɔ ni esa akɛ eba ejeŋ ehã koni no aye abua lɛ ni enyɛ ekpɛ yiŋ kpakpai dani eyafee nɔ ko gbonyo.

Gbii etɛ nɛɛ, fɔlɔi komɛi tsɔseee amɛbii ejaakɛ amɛsusuɔ akɛ kɛ́ amɛfee nakai lɛ, gbekɛbii lɛ baanu he akɛ ashwie amɛhiɛ shi. Shi fɔlɔi ni hiɛ kã shi lɛ woɔ amɛbii mlai ni sa, ni amɛyeɔ amɛbuaa amɛ koni amɛye mlai nɛɛ anɔ.

“Ehe miihia ni ahã gbekɛbii ale nibii ni amɛyɔɔ hegbɛ akɛ amɛfeɔ kɛ nibii ni amɛbɛ hegbɛ akɛ amɛfeɔ, koni no aye abua amɛ ni amɛdara ni amɛtsɔmɔ onukpai kpakpai. Gbekɛbii ni atsɔseee amɛ lɛ tamɔ lɛlɛ ni bɛ kudɔɔ, ni kɔɔyɔɔ baanyɛ atswa lɛ kɛya he fɛɛ he loo ebutu po.”​—Pamela.

Nyɛkakua nyɛhiɛ nyɛfɔ̃a nɔ ni nyɛbii lɛ feɔ lɛ nɔ. Kɛ́ nyɛbii lɛ yeee mlai ni nyɛwo amɛ lɛ anɔ lɛ, nyɛgbalaa amɛtoi. Shi kɛ́ amɛye mlai ni nyɛwo amɛ lɛ anɔ lɛ, nyɛjiea amɛyi.

“Mifɔɔ mibii lɛ ayijiemɔ kɛ́ amɛbo mi toi, ejaakɛ wɔyɛ jeŋ ko ni gbekɛbii booo amɛfɔlɔi toi mli. Kɛ́ ofɔɔ amɛyijiemɔ lɛ, ewaaa akɛ amɛbaakpɛlɛ ni ajaje amɛ kɛ́ ehe bahia.”​—Christine.

BIBLIA MLI SHISHITOO MLA: “Nɔ fɛɛ nɔ ni gbɔmɔ duɔ lɛ, no nɔŋŋ ebaakpa hu.”​—Galatiabii 6:7.

Kaafee kpɛŋŋ. Kɛ́ nyɛmiitsɔse nyɛbii lɛ, nyɛsusua afii abɔ ni amɛye, nibii ni amɛbaanyɛ amɛfee kɛ nibii ni amɛnyɛŋ amɛfee, kɛ bɔ ni nibii ni amɛfee ni ehiii lɛ yɔɔ hiɛdɔɔ hã lɛ he. Bei pii lɛ, kɛ́ gbekɛbii baaná toigbalamɔ ni akɛhãa amɛ lɛ he sɛɛ lɛ, esa akɛ ekɔ nɔ fɔŋ ni amɛfee lɛ he. Akɛ nɔkwɛmɔnɔ lɛ, kɛ́ gbekɛ ko kɛ efon tsuuu nii yɛ gbɛ kpakpa nɔ lɛ, abaanyɛ ahe efon lɛ yɛ edɛŋ be fioo loo afo husu ahã lɛ yɛ nibii ni ebaanyɛ ekɛ fon lɛ atsu lɛ he. Nakai beiaŋ nɔŋŋ lɛ, kaahã nibii bibii komɛi ni gbekɛ lɛ feɔ ni osumɔɔɔ lɛ gbaa onaa fe nine.

“Kɛ́ mibi lɛ fee nɔ ko ni ehiii lɛ, mikwɛɔ kɛji eje gbɛ egbo toi aloo nii ahe ni eyasusuuu jogbaŋŋ lɛ hewɔ ni eba lɛ nakai. Esoro subaŋ gbonyo ni miihe aka gbekɛ ko he ni ebaabi ni akɛ hiɛdɔɔ ajaje lɛ yɛ he lɛ yɛ tɔmɔi bibii ni esa akɛ agbala ejwɛŋmɔ kɛba nɔ kɛkɛ lɛ he.”​—Wendell.

BIBLIA MLI SHISHITOO MLA: “Nyɛkawoa nyɛbii amli la, koni amɛnijiaŋ akaje wui.”​—Kolosebii 3:21; shishigbɛ niŋmaa.

Nyɛhãa amɛnaa akɛ nyɛsumɔɔ amɛ. Kɛ́ gbekɛbii lɛ na akɛ suɔmɔ ni fɔlɔi lɛ yɔɔ kɛhã amɛ lɛ hewɔ amɛtsɔseɔ amɛ lɛ, no lɛ ewaŋ kɛhãŋ amɛ akɛ amɛbaakpɛlɛ tsɔsemɔ lɛ nɔ ni amɛfee tsakemɔi.

“Kɛ́ wɔbi lɛ tɔ̃ lɛ, wɔhãa eleɔ akɛ wɔhiɛ sɔ yiŋ kpakpai ni ekpɛ be ko ni eho lɛ waa. Ni wɔkɛɔ lɛ hu akɛ kɛ́ efee tsakemɔi ni sa lɛ, no lɛ etɔmɔ lɛ fiteŋ gbɛ́i kpakpa ni eyɔɔ lɛ, ni wɔbaaye wɔbua lɛ ni efee tsakemɔi lɛ.”​—Daniel.

BIBLIA MLI SHISHITOO MLA: “Suɔmɔ toɔ etsui shi ni emli hi.”​—1 Korintobii 13:4.