Ang tinaga nga disiplina nagakahulugan sang paggiya ukon pagtudlo. Kon kaisa, nagalakip ini sang pagtadlong sa sala nga ginhimo sang bata. Pero sa masami, nagalakip ini sang moral nga paghanas nga makabulig sa bata nga makahimo sang husto nga mga desisyon.

Sang nagligad nga mga dekada, halos wala na ginadisiplina ang kabataan kay nahadlok ang mga ginikanan nga basi magbuhin ini sa kompiansa sang bata. Pero ang maalamon nga mga ginikanan nagahimo sing nagakaigo nga mga pagsulundan kag ginahanas ang ila kabataan nga sundon ini.

“Kinahanglan sang kabataan ang mga limitasyon para mabuligan sila nga mangin maayo nga mga adulto. Kon indi sila pagdisiplinahon, mangin pareho sila sa baruto nga wala sing timon nga mahimo magtalang ukon magkulob.”—Pamela.

Indi magbag-obag-o. Kon wala ginsunod sang imo bata ang imo pagsulundan, ipadapat sa iya ang silot. Pero, pirme gid sia dayawa kon magtuman sia.

“Pirme ko gid ginadayaw ang akon kabataan kon magtuman sila kay ang kalabanan subong indi matinumanon. Nakabulig ini sa ila para mas mahapos nila batunon ang pagtadlong.”—Christine.

PRINSIPIO SA BIBLIA: “Kon ano ang ginasab-ug sang tawo, ini man ang iya anihon.”—Galacia 6:7.

Mangin rasonable. Ibase ang disiplina sa edad, ikasarang, kag sala sang bata. Mas epektibo ang disiplina kon may labot ini sa sala—halimbawa, ang indi husto nga paggamit sang cellphone mahimo magresulta sa indi pagpagamit sini sa iya. Likawi man nga maakig sa ginagmay nga mga butang bangod lang naugot ka sa sini.

“Ginahibalo ko gid kon bala hungod nga nagsupak ang akon bata ukon nagsala lang sia sa iya desisyon. May kinalain ang malain nga batasan nga kinahanglan tadlungon kag ang sala nga kinahanglan lang ipatalupangod.”—Wendell.

PRINSIPIO SA BIBLIA: “Indi ninyo pagpaakiga ang inyo mga anak, agod indi sila maluyahan sing buot.”—Colosas 3:21.

Mangin mahigugmaon. Mas mahapos batunon sang kabataan ang disiplina kon nahibaluan nila nga ginhimo ini bangod palangga sila sang ila ginikanan.

“Kon makasala ang amon bata, ginahambalan namon sia nga nalipay gid kami sa iya maayo nga mga ginhimo. Ginapaathag namon sa iya nga ang iya sala indi makaguba sang iya reputasyon basta tadlungon niya ini kag handa kami nga buligan sia para mahimo ina.”—Daniel.

PRINSIPIO SA BIBLIA: “Ang gugma mapinasensiahon kag mainayuhon.”—1 Corinto 13:4.