FER TI ELTERE
6: Tisipliin
WAS PETAYT TAS?
Tsipliin khan petayte lënke orer in lërne. Manich mool is aach korikiire een khint woo etwas net richtich kemacht hot. Awer oft mools tisipliin is tas khint in lërne te unerxit fon was richtich orer ferkeyert is. Soo tuut tas khint lërne kuute entxluse mache.
WAROM IS TAS WICHTICH?
In ti letste yoere siits aus tas etliche eltere net sayn khiner tsipliniire, wayl tii hon pang wën se tas mache teete khente ti khiner sich weenich weyert kepe. Awer eltere woo kluuch sin xtele reekle in woo kemesich sin un lërne sayn khiner in fer tii aan heere.
“Ti khiner prayche krense hon fer kemesiche aus kewaksne layt wëre. Oone tsipliin, sin tii wii een xif oone kelënk woo mit ti tsayt ti richtung ferliire un soo kaar um xmayse.”—Pamela
WAS KHANST TUU MACHE?
Halt tayn wort in: Wën tayn khint net tayne reekle aan heere tuut, tan mus tuu tee korikiire. Awer wën tayn khint tich aan heert, must tuu tee loope.
“Ich loope imer mayn khiner wayl se folich sin in een welt woo tas net macht. Wën meyer ti khiner loope fine se laychte ti tsipliin aan nëme.”—Christine
WAS SAAT TI PIIPEL: “Was een mënx planst, tas wërt eyer aach ërnte.”—Gálatas 6:7.
Say kemesich. Kep fer tayn khint een tsipliin woo sich xteet mit sayn elte un mit was tee kemacht hot. Manich mool tsipliin pringt peser resultaat wëns mim feele tsu tuun hot. Een payxpiil, khan sin tas tas khint net aan heert tayn reekle iwich te selular penutse, tuu khanst entxlise tas tee weenicher te selular penutse tërf orer tëm sayn selular wech hole fer een tsayt. Un noch, wën tayn khint net soo was xlimes kemacht hot, macht net fon etwas kleenes was krooses.
“Ich fersuuche ferxteen op mayn khint net keheert hot wayl tee net wolt orer hot tas kemacht oone tenke. Is een unerxit tswixich ploos een mool te feele mache un imer te selwiche feele mache un tas mus korikiirt wëre.”—Wendell
WAS SAAT TI PIIPEL: “Eltere, tuut net ayre khiner ayere, tas se net ti muut ferliire.”—Colossenses 3:21; noote.
Say liiplich. Ti khiner fine laychte ti tsipliin aan nëme wën se xpiire tas sayn eltere se liipe.
“Wii unser soon een feele kemacht hot, waar mer keweent saan tas meyer uns fraye iwer ti kuute entxluse woo tee xon kemacht hot. Meyer hon aus keleet tas wën tee ales mache teet fer ti tinge in ray lose, tas teet net sayn leepe xpeete hin petrefe, un meyer weere imer mit iim fer iim helfe.”—Daniel
WAS SAAT TI PIIPEL: “Ti liip is ketultich un kuut.”—1 Coríntios 13:4.
