KOVANENE
6: Omaviuriro
MAYE KAMBURIRE MOYE
Embo ndi omavyiuriro ri heya okuurika ondjira poo okuhonga. Rumwe, ri kamburira mo okuṱuna ongaro yomuatje. Potuingi, wina, rikamburira mo okuhonga omuatje omeritjindiro omawa kutja mayenene okutoora omikambo omiwa.
ONGWAYE TJERI OHEPERO
Mozombura nḓa kapita, omavyiuriro mo maṱunḓu tjiva yayenda ama yezengi, mena rokutja ovanene vetira kutja omavyiuriro maye ṱikonaparisa oundu womuatje. Nungwari, ovanene mbe nouripura ouwa ve twapo ozoveta nḓe ri zo okuhonga ovanatje vawo kutja ve ṱakamise ozoveta nḓo.
“Ovanatje ve hepa okuraerwa pu mave sokuyandera kutja ve karire ovanene ovawa. Tjipe hina omavyiuriro, ovanatje ve sana koskepi ndji hina omuhinge nu ndji ma peya a i pandjara omuhunga poo a i tungunyuka.”—Pamela.
MOYENENE OKUTJITAVI
Kara nongurameno. Indu omuatje woye tje hina okukongorera ozoveta zoye, twapo omberero ndji mai kongorere ko. Nungwari, aruhe tanga omuatje woye indu tja kongorere oveta ndjiripo.
“Ami aruhe mbi tanga ovanatje vandje tji va raisa onḓuviro mouye mu mu hina onḓuviro rukwao. Okuvetanga kutjita kutja irire oupupu kuwo okuyakura omavyiuriro indu tji maye he perwapo.”—Christine.
OMURARI WOMBEIBELA: “Ihi omundu tji ma kunu, wina otji ma kondo.”—Ovagalate 6:7.
Raisa ounongo. Tara kutja ozombura zomuatje nounongo mbwe na wo mavi hitasana noveta ndji wa twapo poo indee. Omberero irira ombwa tji ma i hitasana nongatukiro ndja tjitwa otjotjihorera, omaungurisiro wongoze omavi maye sokukara nomberero yokuhina okuungurisa ongoze oure woruveze kaaṋi. Kunao, kondja okuhina okuneneparisa otjiṋa otjiṱiṱi tji tja tjitwa kutja tjirire otjinene.
“Ami mbi kondja okutjiwa kutja omuatje wandje wa tjitire owina poo kaharere okutjita nao. Pe na ombangu pokati kongaro ombi tjinene ndji ma i hepa okuisapewa nongatukiro onḓiṱi ndji ma i sokuṱunwa.”—Wendell.
OMURARI WOMBEIBELA: “Vanene, amu handjisa ovanatje veṋu, tjapo ngaave mumapara.”—Ovakolose 3:21
Raisa orusuvero. Omavyiuriro ye rira omapupu kovanatje okuyeyakura indu tji vatjiwa kutja ma ye tjitirwa mena rorusuvero.
“Indu omuzandona wetu tja zunḓa, Eṱe twe mu raera kutja tu nonyuṋe moviṋa oviwa mbya tjita morukapitaveze. Eṱe twe mu setururira kutja ongatukiro ndjo ka i notjiṋa tji ma i tjiti kuye, ndovazu makondjo okutjita omarundurukiro, nu eṱe tu rimbo okumuvatera.”—Daniel.
OMURARI WOMBEIBELA: “Orusuvero ru nomuretima, ru nounyaṋutima.”—1 Ovakorinte 13:4.
