PARA TA MAGANA
6: Disiplina
I KEBALINANNA
I kayà kagian na disiplina ay pangigiya onu panuddu. Nu mittan, nelagum tatun i pangitunung ta marake nga ugali na ana. Ngem maruddu nga nelavu tatun i moral nga passanay tapenu magigiammu na abbing i magangngua tu makasta nga desision.
I IMPORTANSIANA
Ta nappasa ira nga dekada, mammaggi manaki na magana ira nga disiplinan i ánada ta ikassidda nga makkafi i nonoda. Ngem mangiyawa i masirib ira nga magana tu rasonable ira nga bilin anna sanayadda i ánada nga tuttulan danatun.
“Mawag na abbing ira i limitasion tapenu dumakal ira nga mapia i kata-katoleda. Nu awan tu disiplina, kagittada i barko nga awan tu timonna—magga mawawan ta direksion onu lummag.”—Pamela.
I MAKUAM
Ari nakuan mangulu-uli. Nu ari tuppalan na ana i bilinnu ira, siguraduan nga egga katumbasna nga disiplina. Sigga-paran gapa nga komendan nu nagginna yayya.
“Kadabes nga komendakku i ána ku ta minattuppal ira maski nu aru i matagga i uluna. Nu makomendan ira, mas alistuda akseptan i pangikorekta.”—Christine.
PRINSIPIO NA BIBLIA: “Anni laman i nimula na tolay, yatun gabbalaman i gataban na.”—Galacia 6:7.
Mabbalin tu rasonable. Ikonsidera i edad na abbing, i abilidadna, anna i dammo na nakuana. Mas efektibo i disiplina nu konektadu yatun ta nakaliwatadda—angngariganna, nu kadda siminuttul ta bilinnu ta pangusa tu cellphone, awayyanu konfiskan onu ilimita i pangusada. Ariannu gapa padakallan i baddi nga gannug megafu laman ta nairita kamu.
“Innakku tu mapia nu talaga matagga i ulu na ana ku onu baka nakkamali laman yayya ta paddesisionna. Egga pakkaduman na marake nga ugali nga mawag alsan anna na kamali nga mawag laman mefustu.”—Wendell.
PRINSIPIO NA BIBLIA: “Arian nu nga poporayan ta ari nga mepangngo i ána nu, ta marakay nu makkafi i nono da.”—Colosas 3:21.
Minangngiddu nakuan. Mas mabi nga alawatan anna iyaplika na ána i disiplina nu ammuda nga megafu yatun ta aya na maganada.
“Kada makkamali i anami, ipasiguradumi nisa nga proud kami lapa ta ngamin nga makasta nga desisionna ta nappasa. Iyesplikami nga ari madaral i reputasionna basta kuanna i mawag nga mefustu anna uffunammi yayya.”—Daniel.
PRINSIPIO NA BIBLIA: “I aya ay pappasensia anna pagallo.”—1 Corinto 13:4.
