ỌSI ENEBIỌMỌN
6: Adia
EBI A RE ỌLE TA
Nan rẹ man ọmọn emhin la gbe ọle sibhi esankan re, ọle hi nan rẹ dia ọne ọmọn. Ọnan rẹman ghe ahamiẹn ọmọn lu emhin nọn imhẹn, ene biẹ ọle ki re adia nanlẹn. Rẹ gbera ọnin, ele ki yẹ ha man ọlẹn emhin beji a da miẹn ghe, ọle ki sabọ tobọle ha zẹ emhin ne mhẹn bhi iẹnlẹn nọnsọle.
EBEZẸLE NỌN DA KHẸKE
Ẹlẹnan nian, aba bi inẹn ne bunbun iyẹ gbudu re adia nin imọn nesele. Ele riale ghe adia nan re nin ọmọn dẹ re ọne ọmọn ha ghe egbe ọle bii ọria nọn bha sẹ emhin soso. Ọkpakinọn, aba bi inẹn ne mhọn ẹwanlẹn lẹnmhin ghe ọkhẹke nin ele ha gbe uhi nin imọn nesele, yẹ ha rẹkpa ele rẹ re obọ rẹkhan ene uhi.
“Nin ibhokhan rẹ sabọ wanre kiẹn imọn esili, ọkhẹke nin ene biẹ ele rẹkpa ele lẹn emhin nọn khẹke nin ele ha lu bi emhin nọn khẹke nin ele rẹban. Ahamiẹn ene biẹ ọmọn bha dia ọmọn nọnsele, ọne ọmọn ki diabe okọ nọn imhọn emhin nan rẹ dia ọle. Okọ nọn sẹ iriọ, dẹ sabọ sibhi uwedẹ re la ọ ki ruẹ.”—Pamela.
EBI UWẸ HA SABỌ LU
Ha lu rẹkhan emhọn nin uwẹ tale. Ahamiẹn ọmọn nọnsẹ bha lu rẹkhan uhi nin uwẹ gbe nanlẹn, re adia nọn khẹke nanlẹn. Bhi obọ nọnkẹle, ahamiẹn ghe ọle lu rẹkhan uhi nin uwẹ gbe nanlẹn, hẹi riia ẹghe a rẹ taman ọlẹn ghe ọle lu nọnsẹn.
“Ẹghe rebhe mẹn rẹ gẹn imọn nesẹmhẹn bhi uwedẹ nin ele rẹ hẹnmhọn nin mhan arẹmiẹn imọn ne bunbun iyẹ hẹnmhọn nin ene biẹ ele. Mhan ha re inian ha gẹn ele, ọ ki lẹkhẹ nin ele rẹ miẹn adia nin mhan re nin ele ọbhi egbe.”—Christine.
ADIA NỌN RIBHI BAIBO: “Emhin nọn hi ki rẹ khin nin ọria kọ, ọne emhin ọle da sẹyẹ ro.”—Galatians 6:7.
Lu emhin ọbhi oleghe. Ahamiẹn uwẹ gbe ọmọn bhi esankan, ọkhẹke nin uwẹ ne ọne ọmọn lu emhin beji ọle wanre sẹ, beji ọle lẹn emhin sẹ, bi beji emhin nin ọle lu khọ sẹ. Ọ dẹ mhẹn nẹ sade adia nin uwẹ re nin ọmọn rẹtẹ emhin nin ọle lu khọ. Bhi ọsi ijiẹmhin, ahamiẹn ghe ọmọn bha noo ifoni bhi uwedẹ nọn khẹke, uwẹ sabọ rẹ miẹn ọle ọne ifoni bhi ẹgheso. Sẹyẹ, hẹi wo ha re ohu ranmhude ẹmhọn nọn bha sẹ emhin soso nin ọmọn nọnsẹ lu.
“Mẹn dọnmhegbe rẹ lẹn si ọmọn nọnsẹmhẹn muegbe lu emhin nin ọle lu la si idobọ nọn. Ikikẹ ribhi emhin nọn imhẹn nin ọmọn guẹle bi emhin nin ọle dobọ lu. Ọ ha yi emhin nin ọle guẹle nọn, ọ ki khẹke nan re adia nanlẹn. Ọkpakinọn, ahamiẹn idobọ nọn, uwẹ ki ji ọle lẹn.”—Wendell.
ADIA NỌN RIBHI BAIBO: “Bha nin aba, bha hẹi ha lu emhin nọn ha re ẹkẹ ha khọ imọn nesẹbha, nin egbe hẹi lọ ele.”—Colossians 3:21
Ha re oyẹẹ man. Ọ lẹkhẹ nin imọn rẹ re obọ rẹkhan adia nan re nin ele sade ele lẹn sẹbhọ ghe, oyẹẹ zẹle nin aba ele bi inẹn ele da re ọne adia nin ele.
“Ọmọn nọnsẹmhan ha dobọ lu emhin nọn bha gba, mhan ki dọnmhegbe rẹ ji ọle lẹn ghe, emhin esili nin ọle lu bhi ẹghe nọn gbera wo ti mhan bhọ. Mhan ki yẹ taman ọlẹn ghe, ọle ha dọnmhegbe rẹ fidenọ, mhan ida ha re ẹlo emhin nin ọle lu rẹ ghe ọle. Mhan ki yẹ ji ọle lẹn ghe mhan dẹ rẹkpa ọle.
ADIA NỌN RIBHI BAIBO: “Ahoẹmhọn-egbe mhọn iziẹngbe bi ifuẹkẹ.”—1 Corinthians 13:4.
