Nọ ọmọ o te ruthọ, o gwọlọ nọ a rẹ kpọe họ jẹ vuẹe oware nọ u fo nọ o re ru ẹdẹfa. Rekọ nọ ọmọ o te ruthọ ọvo a rẹ rọ kpọe họ họ, o gwọlọ nọ a re wuhrẹ iẹe noke toke re ọ sae jẹ emamọ iroro nọ ọ be kpako ze na.

Anwọ ikpe jọ ze na, esẹgbini jọ a gbẹ be rọwo kpọ emọ rai họ họ, keme ozọ u re mu ai nọ a te ru ere, emọ na a ti rri omarai nọ a fioka ha. Rekọ esẹgbini nọ i wo areghẹ a riẹ nọ u wo izi jọ nọ u fo nọ a re fihọ kẹ emọ rai, a ve je wuhrẹ ai epanọ a re ro koko izi na.

“U fo nọ esẹgbini a rẹ vuẹ emọ rai oware nọ a re ru gbe oware nọ a re ru hu re a sae jọ emamọ ahwo evaọ ẹdẹfa. Nọ a gbẹ be kpọ emọ họ họ, emọ na a rẹ sae jọ wọhọ okọ nọ u wo uvi hi, yọ ame ọ sai su okọ utioye na kufiẹ hayo u ve zue dede.”​—Pamela.

Hae kpọ emọ ra họ ẹsikpobi. Nọ ọmọ ra ọ gbẹ rọwo koko uzi nọ who fihọ họ, ru ei oware nọ whọ vuẹ riẹ nọ who ti ru ei nọ o gbe koko uzi na ha. Rekọ ọmọ ra o te koko uzi na, nabi jiri ei ziezi.

“Kẹse kẹse me re jiri emọ mẹ fikinọ a bi yoẹme evaọ akpọ nana nọ emọ a bi jo yoẹme he na. Fikinọ me re jiri ae ẹsikpobi na, u te ru nọ a rẹ rọ gaviezọ nọ mẹ tẹ be whọku ae hayo kpọ ae họ.”​—Christine.

EHRI-UZI EBAIBOL: “Oware kpobi nọ ohwo ọ be kọ, oye o ti vu re.”​—Ahwo Galesha 6:7.

Jọ ọwhọkuo na ọ jọ umumuo. Unuikpe nọ ọmọ na ọ rrọ, oware nọ ẹgba riẹ o te gbe epanọ oware nọ o ru na u yoma te eye who re rri rọ kpọe họ hayo whọku ei. Nọ whọ tẹ be kẹ ọmọ ra uye fiki oware jọ nọ o ru, ruẹ nọ uye nọ whọ be kẹe na o wobọ kugbe oware nọ o ru na. Wọhọ oriruo, nọ ọmọ ra ọ tẹ be nẹ ifonu gahrọ hayo nọ ọ tẹ rehọ iẹe ru oware jọ nọ u fo ho, whọ sai mi ei ifonu na evaọ omoke jọ. Rekọ orọnikọ omoware kpobi nọ ọmọ na o ru who re zihe ruọ okpoware he.

“Nọ ọmọ mẹ o te ruthọ, mẹ rẹ daoma riẹ sọ o keke aro fihọ ru oware na hayo o thọe obọ. Oware nọ o reria ọmọ obọ no nọ u fo nọ a re fiobọhọ kẹe re o siobọno avọ oware nọ o thọ ọmọ obọ nọ u fo nọ a re dhesẹ kẹe ọvo e rrọ epọvo na ha.”​—Wendell.

EHRI-UZI EBAIBOL: “Wha ru eva dha emọ rai hi, re udu u gbe whrehe ae hi.”​—Ahwo Kọlọsi 3:21; ẹme-obotọ.

Rọ edhere oyoyou kpọ ae họ. Nọ emọ a tẹ ruẹ nọ fikinọ ọsẹgboni na a you rai a be rọ kpọ ae họ na, ẹsiẹ a te mae rọ gaviezọ kẹ ọsẹgboni na je ru oware nọ a be ta kẹ ae na.

“Nọ oware o tẹ thọ ọmọ mai obọ, ma rẹ kaki jiri ei rọkẹ eware iwoma nọ ọ be hai ru. Ma vẹ vuẹe nọ fikinọ oware na o nwane thọe obọ na, u dhesẹ nọ ekpehre ọmọ ọ rrọ họ nọ orọnọ ọ be daoma re ọ gbẹ wariẹ oware na ha na. Yọ ma rẹ jẹ vuẹe nọ ma ti fiobọhọ kẹe.”​—Daniel.

EHRI-UZI EBAIBOL: “Uyoyou u re wo odiri, o tẹ jẹ rrọ wowou.”​—1 Ahwo Kọrint 13:4.