KWONDŨ WA ASYAI
6: Ũkany’o
ŨU NĨ KWASYA ATA?
Ndeto ũkany’o no yonany’e kũtongoesya kana kũmanyĩsya. Mavinda amwe no yonany’e kũkany’a mwana nũndũ wa ĩvĩtyo wĩkĩte. Ĩndĩ mavinda maingĩ yonanasya kũmũtetheesya mwana amanye ũndũ ũtonya kwĩka motwi maseo.
NĨKĨ NĨ ŨNDŨ WA VATA?
Myakanĩ ya mĩtũkĩ, syana mbingĩ syĩthĩĩtwe iteũnengwa ũkany’o, na kĩtumi nũndũ asyai aingĩ makĩaa kũkany’a syana syoo maisũanĩa kana meeka ũu nĩsyĩkwambĩĩa kwĩvũthya. Ĩndĩ asyai oĩ nĩmekĩĩaa syana syoo mĩao ĩla yaĩlĩte na mayĩitetheesya imanye ũndũ itonya kũmĩatĩĩa.
“Syana nĩsyaĩle kũmanyĩw’a maũndũ ala syaĩle kwĩka na ala itaĩle kwĩka nĩ kana iane na iitw’ĩka andũ aima ma kwĩkwatw’a. Syana ikeana iteũnengwa ũkany’o, syĩthĩwa siilyĩ meli ĩte na sukani ĩla yĩsaa kwasya nzĩa na ĩilika kĩw’ũnĩ.”—Pamela.
ŨNDŨ ŨTONYA KWĨKA
Lũmany’a na mĩao ĩla wĩkĩĩte. Ethĩwa mwana waku ndanalũmany’a na mĩao ĩla ũmwĩkĩĩe, ĩkĩĩthya kana nĩwamũnenga ũkany’o. Ĩndĩ ethĩwa mwana waku nĩũatĩĩaa mĩao ĩla ũmwĩkĩĩe, ndũkaeme kũmũkatha.
“Nĩnĩkathaa syana syakwa mavinda maingĩ nũndũ wa kwĩthĩwa syĩ mbĩwi o na kau andũ aingĩ mayĩthĩawa me ewi. Yĩla namakatha, wĩthĩaa nĩ laisi kwoo kwĩtĩkĩla ũkany’o yĩla mesa kũvĩtya.”—Christine.
MWOLOOTO WĨ MBIVILIANĨ: “O kĩla mũndũ ũvandaa, nokyo ũkaketha.”—Akalatia 6:7.
Ĩthĩwa na kĩthimo. Yĩla ũũkany’a mwana, sũanĩa ũkũũ wake, ũtonyi wake, na ĩvĩtyo yĩla wĩkĩte. Ũkany’o ũtethasya mwana ethĩwa nĩwosanĩte na ĩvĩtyo yĩla wĩkĩte. Kwa ngelekany’o, ethĩwa mwana waku ndanatũmĩa simũ nesa kwosana na mĩao ĩla ũmwĩkĩĩe, no ũmũvate kũmĩtũmĩa, kana ũkethĩa kwa kavinda keana ũna ndakamĩtũmĩaa mũno. O na vailyĩ ũu, sisya ndũkathatw’e nĩ tũmaũndũ tũnini tũla wĩw’aa ũte vata natw’o.
“Nĩnĩtataa kũsũanĩa ethĩwa mwana wakwa ekie ĩvĩtyo na ngũlũ kana ethĩwa avĩtisye nũndũ wa kũema kũsũanĩa nesa. Ve kĩvathũkany’o kya kũtindĩa kwĩka ĩvĩtyo ĩna na kwĩthĩwa na wonzu waĩle o kũlũngwa.”—Wendell.
MWOLOOTO WĨ MBIVILIANĨ: “Mũikathatye syana syenyu, nĩ kana iikakw’e ngoo.”—Akolosai 3:21.
Ĩthĩwa na wendo. Wĩthĩawa wĩ ũndũ wĩ laisi kwa syana kwĩtĩkĩla ũkany’o na kũlũnga mavĩtyo syamanya mũsyai aikanasya nũndũ nũsyendete.
“Yĩla kĩmwana kitũ kyeeka mavĩtyo, nĩtwakĩĩkĩĩthasya kana nĩtũtanĩaa motwi maseo ala kĩkaa. Nĩtwakĩeleasya kana ĩvĩtyo yĩu yĩikyanangĩa ndaĩa kyeelũnga na kana nĩtweeyũmbanĩtye kũkĩtetheesya kĩlũnge ĩvĩtyo yĩu.”—Daniel.
MWOLOOTO WĨ MBIVILIANĨ: “Wendo nĩweteelaa na nĩwĩkaa ũseo.”—1 Akolintho 13:4.
