Dama ku chemela li nga dwa ku tungamila kene ku diya. Mu zwibaka zwingwe, lo shanganyila ku tambunudza mazwibato e ngwana. Ka njinji, wale li nga dwa, ku diya mazwibato e buthu a nga batsha ngwana ku zwidiya ku tola thambo dza ka lulwama.

Mu makole a pejo a ka pinda, ku chemela dumbu kwa ka pela mu misha ingwe, ngoti bazwadzi ba no cha kuti ku chemela ku nga tapudza ku zwi-themba kwe ngwana. Ne kwa ka jalo, bazwadzi ba ka chenjela ba no bigila bana milayo i no hwika kuti ba i shingise.

“Bana ba no sheta ku diyiwa kuti ku na pa ba ka fanila ma kuti ba kule ku be bathu ba wola ba no linga zwithu ne zila ya ka fanila. Bana ba singa chemegwe, ba no nga ikepe chi no zwilawula—chi no pelela chi buda mu zila naiko ku pituka dumbu.”—Pamela.

Batilila mu na cha ka lulwama. Ha ngwana a singa hwe nlayo uwo, thama kuti a zwihwigwe belelo la khona. Kakale, u ntolele pezhugwi ha e hwilila nlayo uwo.

“Mu zwibaka zwi njinji ndo tolela bana bangu pezhugwi ha be hwa nlayo mu shango iyeyi i singa hwe nlayo. Ku ba tolela pezhugwi ko thama kuti ku be ku lelu mu bali ku chemegwa ha ku sheteka.”—Christine.

NLAYONTEWO WE BAIBILI: “Nthu u no vuna tja a dzwala.”—Bagalatiya 6:7.

Ibe nthu u no hwisisa. Yendidzanya makole e ngwana ne bukhoni gugwe ku dumana ne cha a ka fanila thama. Belelo le mazwibato e nthu la ka fanila yendidzana ne nlandu wa a thama—ha ti lakidzila, ku sa shingisa fowuni zwibuyanana ku nga pelela ne kuti nthu a tolegwe fanilo ye ku i shingisa mu chibaka ka cha ka tini. Ne kwa ka jalo, u si tole zwithu zwitechanana u ka zwithama zwikulukulu ku singa sheteke.

“Ndo lingilila kuti ngwanangu wa thama chingwe ngwaza kene wa thama phoso koga mu ku linga zwithu.Nlandu nkulukulu u no shaka baakanyiwa ha u to fanana ne nlandu koga u si wa chingwe u no shaka lakidziwa nthu.”—Wendell.

NLAYONTEWO WE BAIBILI: “Mu si tange bana benyu, ngobe ba nga dwa be nyalamoyo.”—Bakolosa 3:21.

Ibe ne ludo. Ku chemegwa ko be ku lelu mu bana ha be ziba kuti bazwadzi ba no ku thama be sundidzigwa ne ludo.

“Ha nkololo wedu e thama dziphoso, ta ka n’gadza moyo kuti to tolela pezhugwi thambo dza a ka tola dza ka lulwama mu chibaka cha ka pinda. Ta ka nchenesela kuti dziphoso dzidze ha te idzo dza ka fanila lingiligwa ha koga a nga zwichemela pa no sheteka ne kuti to be ti li po ku mbatsha ku thama e jalo.”—Daniel.

NLAYONTEWO WE BAIBILI: “Ludo gu na moyonlefu, gu na nzhazho.”—1 Bakorinta 13:4.