Тӱзедіп ӱгреткені палаа устағлар пирчеткенін паза аны ӱгретчеткенін таныхтапча. Пірееде, паланың тудынызын алыстырар ӱчӱн, аны хызааннирға килісче. Іҷе-пабалар палазын, чахсыны чабалдаң талластырып оңназын паза позы орта пӧгіннер алзын тіп, тӱзетчелер.

Халғанҷы чылларда іҷе-пабалар, палаларының самооценкаларын тӱзірбес ӱчӱн, оларны тӱзедерге хорыхчалар. Че сынап палаларына хынчатхан іҷе-пабалар оларға правилолар турғысчалар паза ол правилоларҷа тудынарға ӱгретчелер.

«Палаа, чахсы кізі полып алар ӱчӱн, правилолар кирек. Аны тӱзетпин ӧскірзе, ол руль чох кимеге тӧӧй полар. Андағ киме, тізең, удаа саайға кір парча» (Памела).

Турғысхан правилоларҷа тудыныңар. Пала іҷе-пабазы турғысхан правилоларҷа тудынминчатса, аны тӱзедерге кирек. Чооғыңарны исчетсе, тізең, аны махтап турыңар.

«Мин палаларымны чооғымны исчеткен ӱчӱн удаа махтирға кӱстенчем. Амғы туста чоох исчеткен пала асхынах. Махтаттырған пала, аны тӱзетселер, тың хомзынминча» (Кристин).

БИБЛИЯДАҒЫ ПРИНЦИП: «Кізі позы таарыпчатхан нимені чыып алча» (Галат чиріндегілерге 6:7).

Хыйға тудыныңар. Паланы тӱзетчетсер, аның чазын паза способностьтарын санға аларға кирек. Хатығлааны, паланың саба иткен кирегінең палғалыстығ полза, иң туза полар. Кӧзідімге, пала іҷе-пабазы телефоннаңар турғысхан правилоны сайбапчатса, ағаа телефоннаң хаҷан, хайда паза нинҷе тус тузаланарға чарир тіп хоза правило турғызыңар. Палаңарны сірерні хыпчыхтандырчатхан на ӱчӱн хатығлабаңар.

«Палам ӧнетін чооғымны испинче бе алай олаңай ла алҷаас ит салған ма, піліп аларға кӱстенчем. Хомай хылииның ӱчӱн іди тудынчатса, аны хатығлап тӱзетчем, олаңай алҷаас ит салза, анзына аның хайиин на айландырчам» (Уэндэл).

БИБЛИЯДАҒЫ ПРИНЦИП: «Палаларыңның кӧңнілері тӱспес ӱчӱн, оларны хыпчыхтандырбаңар» (Колосстағыларға 3:21).

Хыныснаң тӱзедіп ӱгредіңер. Палалар іҷе-пабалары оларға хынчатхан ӱчӱн оларны тӱзетчеткеннерін пілзелер, тӱзедіге чахсы ӱндезерлер.

«Оолғыбыс алҷаас ит салза, піс ағаа хынчатханыбыстаңар чоохтапчабыс паза ол алҷаас ӱчӱн ол хомай кізі пол парбинча тіпчебіс. Ол позы алҷаазын тӱзетсе, аның репутациязы кірлел парбас тіп чоохтапчабыс паза піс ағаа анзында полыс пирербіс тіп ізендірчебіс» (Дэниел).

БИБЛИЯДАҒЫ ПРИНЦИП: «Хыныс тыстанча, хыныс айапча» (1 Коринфтегілерге 13:4).