LE KALAŊ CHUAUWA
6:Silaa
NYƐ O SIMNDO
Diomndo hoo silaa sim ni, waŋndo nɛi chɔmaa kioo ɔɔ pɛɛkoo ndu. Lepum, o sim vɛlɛ le chua numndo ɔɔ po numndo miŋgioo o nɛi te o tosa pɛ kaa wɔɔŋndo. Teleŋnda bɔɔbɔɔ, o sim vɛlɛ le chua numndo ɔɔ po numndo kioo pɛɛkula mala ndu mbo tosa kɛɛsiaa kɛndɔɔ o yoomoo niŋndaŋ.
LE YƐƐ HEI CHO YƐ SUƐI SƆVƐ?
O wɔsila laŋga hiou laŋ bɛŋgu, kalaŋ chuauwaa bɔɔbɔɔ cho lɛ chuauwaa ndaa sila le. Kanifuule, a cho siooŋnde yɔŋii nda tusi chuauwaa ndaa siɔmbulaŋ. Kɛ a koŋ kpou, mi kalaŋ chuauwaa nɔ taasioo wa sila chuaa ndaa. Nduyɛ, ma ke nda nɛila chɔmaa laŋ le ma tol taŋ kɔɔli.
“Chuauwa nɔ ma sina kpeleŋ ndaa le nda malaa haaa ma simnuŋ kaasoŋnda. Te chuauwa sɔla sila sɔviɔɔ le, a cho kɛɛsiaala wɔɔŋndaŋ tosa. Nduyɛ, mi keŋ chuu nda fulamakɔɔlila wɔɔŋndaŋ o chilaŋ niŋ.”—Pamela.
NYƐ Ŋ NƆ MA TOSA WO
Tosa nyɛ ŋ dimi wo. Te chuauwaa numnda huulu pɛ kpeleŋnda ŋ kɛsul nda laŋ, a nɔ ma ke nda sila tuu kpɛi ŋ dimul nda wo. O baa pilɔɔ choo, te a diikuŋ ndaŋ pɛ, a nɔ ma chandu nda.
“Chieeŋ naŋ cho hau niŋndo, chuauwa diikuŋ ko wana le. Le hei, mi chandu chuauwaa niaa tau le diikɔŋ ndaa. Chuauwaa numnda chandɔɔ tosa ndi tɛtɛlɛ le ma chɛl sila ŋ cho nda kioo wo.”—Kilisiŋ.
SAWA MANDAA BAABUIYO: “Nyɛ waŋndo saŋ ndo, ndu o kuau ni.”—Kaleesiaŋnda 6:7.
Chɔm sinapɛŋgoo. Te a wa chua numndo ɔɔ po numndo silaa pɛ, kɛsiŋ wɔsiŋ ndɔŋ o kɔl, mɛɛ o bii sɔɔŋ bila yɛ, nduyɛ a mɛɛ kpɛ suɛi wɔɔŋ o tosa ve cho yɛ. Silaa wa o kɛndɛ te o chɛlaŋ pɛ a suɛi wɔɔŋ o tosa ve. Le tamaseliiyo, te o tul nɛila chɔmaala ŋ ke ndu le foŋndo soliŋndo kpeku laŋ kɔɔli le, a puu ndu o ba le teleŋ tiŋ. Kɛ a koŋ kpou, hiu kɔllo tuulu o sɔɔŋ taaniŋndoŋ choo le mɛɛ o tɛɛmbuu num kɔl lɛ le.
“Mi kindiŋ le sinaa te a hɔlaa vesɛi kpɛsɛkɛɛ po nuu ɔɔ chua nuu kɛɛ ya diikɔŋndo ni, ɔɔ te biondɔŋndo koni o tosa ni. Teŋgeŋndo cho biondɔŋ yɔŋaa tɛɛŋ a kaa wɔɔŋ chua numndo ɔɔ po numndo nɔ ma yeema le ndu malaa mbo tosa wallo lechoo wo.”—Wiŋndɛl.
SAWA MANDAA BAABUIYO: “La wa chuauwaa nyaa biyɔɔ wɔɔŋ te, yɔŋii nda tambu kɔl.”—Koloosiaŋnda 3:21.
Chɔm kaalaa. Te chuauwa sina pɛ maa le mɛɛ wanaa velu nda wa kaala nda yɛ nda cho nda silaa ni, o wa tɛtɛlɛ ma chɛl sila koŋ nduyɛ ma dɔu ndu o wali niŋ.
“Te po naa tosa biondɔŋndaŋ pɛ, miŋ ke ndu kɔl dɛɛniaa. Nduyɛ, miŋ dimul ndu maa ŋ naŋ bɔɔ kɔl le kɛɛsiaala kɛndɛla o tosa niŋ paandu laŋ. Miŋ tɛɛsial ndu maa biondɔŋnda ndɔlaŋ la tɛɛmbuu diola ndɔlaŋ te, te o yɔŋ pɛ mbo kindiŋ kpoke le wallo tosaa o laŋ choo. Nduyɛ, ŋ wa a ndu latulu le ndu malaa mbo tosa keŋ.”—Daaniɛɛ.
SAWA MANDAA BAABUIYO: “Wana nɔ kaalaa wo biunuŋ, nduyɛ o nɔ kɛndɛi.”—1 Kɔliŋtiaŋ 13:4.
