O mvovo longi disongele vo fila yovo longa. Ezak’e ntangwa, disongele vo tumba o mwana ovangidi diambu diambi. Kansi, nkumbu miayingi, o longa o mwana disongele vo songa kwa mwana e nswaswani ya edi diambi ye edi diambote. Muna mpila yayi, o mwana olongoka baka nzengo zambote lembi vava singikwa diaka.

Mu mvu miviokele, dimonekanga vo mase mankaka ke belonganga diaka wan’au ko. Edi beyindulanga vo ediadi dilenda fila wan’au mu kuyimwena vo ke bena mfunu ko. Kansi, mase mangangu besikidisanga nsiku muna tezo yo longa wan’au una balenda mio lemvokela.

“O wana nkendelo bevuanga o mfunu muna kituka wantu ambote vava bekola. Kondwa malongi, o wana bekala nze nlungu wakondwa e nkafi. O nlungu wakondwa e nkafi, ulenda vila yovo nkutu dimuka.

Kala nkwa sikididi. Avo mwan’aku kalemvokele e nsiku osikidisi ko, ofwete kuntumba kikilu. Kansi, unsanisinanga mpe vava kekulemvokelanga.

“Nkumbu miayingi, isanisinanga wan’ame wau vo belemvokanga kana una vo tuzingilanga mu nza yayi yazala ye akolami. Vava tukalanga ye fu kia sanisina o wana, diasazu dikala kwa yau mu lemvokela avo tubavene longi.”—Christine.

DINA BIBILA KIVOVANGA: “O muntu konso kina kekuna i kiau mpe kekutika.”—Ngalatia 6:7.

Kala ye tezo. Vava olonganga o mwa’aku diambote mu sungamenanga e kimbuta kiandi, ngangu zandi, yo zaya e tezo kia vilwa kavangidi. Nkumbu miayingi, e longi ditwasanga e nluta vava dikalanga e nguizani yo vilwa kavangidi o mwana. Kasikil’owu, dilenda kala vo mwan’aku nsiku kakulwidi mu kuma kia mpila yasadila e telefone. Muna kuma kiaki, olenda baka e nzengo kana vo okulula e ola kesadilanga e telefone yovo onkuntambula e telefone mu fikolo. Kansi, avo mwan’aku kavangidi vilwa wampwena ko, diambote mu kala ye tezo yo venga sakisa o mambu.

“Ivavanga bakula e kuma kifididi mwan’ame mu kolama, i sia vo, mu luzolo lwandi kavangidi wo yovo ve. Ediadi diamfunu kadi vena ye nswaswani vana vena fu kiambi kina kifwete katulwa vana vau yo vilwa wakete una ulenda singikwa.”—Wendell.

DINA BIBILA KIVOVANGA: “Ke nufungisa wan’eno makasi ko, kimana balembi kendalala.”—Kolosai 3:21.

Songa zola. Diasazu dikalanga kwa wana mu tambulwila e longi vava mase mau bekubavaninanga dio kuna zola.

“Vava wan’eto bavanganga vilwa, nkumbu miayingi twabavovesanga vo kiese kiayingi twamonanga vava babakanga nzengo zambote. Twabasasilanga vo avo bavangidi mawonso muna singika o vilwa bavangidi, ke befunzula nkumbu au ambote ko.”—Daniel.

DINA BIBILA KIVOVANGA: “O zola kuna yo luzindalalu ye ngemba.”—1 Korinto 13:4.