Maˍ piˇ ve k’oˆ gaˇ ve lehˬ, te hk’aˇ dawˇ hk’aˇ htaꞈ beˆ maˍ piˇ ve yoˬ. Teˇ pawˆ pawˆ k’o yaˇ ve te hk’aˇ dawˇ hk’aˇ maˇ daꞈ ve pa tuˬ maˍ piˇ ve yoˬ. Teˇ pawˆ pawˆ k’o yaˇ cawˇ ve dawˇ cheˆ g’a tuˬ daꞈ ve awˬ liˇ awˬ hk’aˇ maˍ piˇ ve yoˬ.

Ponˬ laˬ ve hk’aˬ nyiˇ hk’awꞈ maˇ gaˬ sheˍ htaˇ, yaˇ a shu yawˇ awˬ to htaꞈ hk’a dehꞈ maˇ yonˍ g’a la ve tehꞈ awˬ pa awˬ e dawˇ hkiˉ ve pa taw yaˇ htaꞈ maˍ piˇ maˇ haˆ ve yoˬ. Yaꞈ hk’aˇ, cuˇ yiˍ cawˬ ve awˬ pa awˬ e lehˬ yaˇ g’aꞈ te g’a tuˬ keunˍ daꞈ cawˇ daꞈ ve awˬ liˇ teh piˇ ve yoˬ.

“Yaˇ ehˉ teˇ hpaˍ yawˇ hui uiˍ la leh daꞈ ve chaw hpehꞈ g’a tuˬ yaˇ ehˉ htaˇ kaꞈ aˬ htoꞈ ma te g’a ve aˬ htoꞈ ma maˇ te g’a ve htaꞈ g’a maˍ piˇ ve yoˬ. Yaˇ yaˇ ehˉ htaˇ kaꞈ maˇ maˍ piˇ ve k’o, haw lawꞈ k’oˍ yawˇ ve awˬ hk’aˇ htaꞈ maˇ k’ai leh awˬ mehˍ hpawˇ lo caˉ pehˆ maˇ cawˬ ve htaꞈ shuˍ leh awˬ leh meuˇ htaˇ iˉ k’aˆ hk’aw tuˍ loꞈ-e ve yoˬ.”—Hpa˗meˬla.

K’oˆ taˍ ve hk’e g’aꞈ te ve: Awˬ liˇ teh taˍ ve hk’e yaˇ maˇ g’aꞈ te ve k’o, g’a maˍ piˇ ve yoˬ. Yaꞈ hk’aˇ, nawˬ awˬ liˇ teh taˍ ve hk’e yaˇ g’aꞈ te ve k’o, yaˇ htaꞈ g’a chiˇ mvuh piˇ ve yoˬ.

“Chi beuꞈ teˇ co-e yaˇ laiˉ g’aˇ awˬ pa awˬ e hkawˇ maˇ na yuˬ ve htawˇ, yaˇ ngaˬ ve hkawˇ na htaˇ yawˇ hui htaꞈ laiˉ pawˆ chiˇ mvuh piˇ ve yoˬ. Ngaˬ yaˇ htaꞈ chiˇ mvuh piˇ k’o ngaˬ yawˇ hui htaꞈ shaˍ tiꞈ piˇ htaˇ maˇ heˆ leh maˍ piˇ htaˇ, yawˇ hui haꞈ yuˬ sha ve yoˬ.”—Hkiˆti.

LIꞈ HPU HK’AW BEˆ MAˍ LAˇ TAˍ VE: “Chaw teˇ gʼaˇ lehˬ, yawˇ awˬ yawˇ sheˍ ve hkʼe yawˇ gʼa gʼeuꞈ tuˬ yoˬ.”—Gaˍlaˍtiˆ 6:7.

Awˬ hk’aˇ ca ve: Nawˬ yaˇ htaꞈ maˍ piˇ htaˇ, yaˇ ve a shaꞈ, yaˇ ve te puiˉ te hpehꞈ ve, leh yaˇ te yaꞈ ve awˬ ceuˬ htaꞈ nawˬ g’a dawˇ nyi piˇ ve yoˬ. Maˇ-awˍ ve k’o nawˬ yaˇ htaꞈ maˍ piˇ ve daꞈ jaˇ ve awˬ hk’aˇ lehˬ, nawˬ maˍ piˇ htaˇ yaˇ te yaꞈ ve awˬ ceuˬ htaꞈ g’a nyi ve yoˬ. Tawˇ pa haˉ te k’o, tawˇ yaw tuˬ awˬ hk’eun yehˇ tuˬ awˬ liˇ teh taˍ ve htaꞈ yaˇ maˇ g’aꞈ te ve k’o, nawˬ yaˇ htaꞈ tawˇ yaw tuˬ awˬ hk’eun teˇ tcuhˉ teˇ yanˇ maˇ yehˇ tcuh ve yoˬ. Yaꞈ hk’aˇ, yaˇ te tawˆ la ve awˬ ceuˬ a yeˇ maˇ uiˍ leh nawˬ maˇ dawˇ cawˇ ve htaꞈ pa taw yaˇ htaꞈ taˇ maˍ piˇ.

“Yaˇ ngaˬ hkawˇ hk’a dehꞈ maˇ na ve, maˇ heˆ leh yaˇ maˇ dawˇ maˇ gaˇ ve hk’aw te yaꞈ ve laˇ tehꞈ ngaˬ hkʼa dehꞈ nyi ve yoˬ. Yaˇ te hk’aˇ dawˇ hk’aˇ maˇ daꞈ ve k’o, g’a gu piˇ cawˇ ve yoˬ. Yaꞈ hk’aˇ, laiˉ pawˆ k’o, yaˇ yaꞈ kuiˬ htaꞈ shaˍ tiꞈ piˇ ve ceh kaꞈ taˍ-oˬ ve yoˬ.”—Ven˗den.

LIꞈ HPU HK’AW BEˆ MAˍ LAˇ TAˍ VE: “Nawˬ hui ve yaˇ teˇ hpaˍ nyi ma maˇ gʼa luˬ tuˬ, yawˇ hui nyi ma zuhˆ tuˬ taˇ te.”—Kawˇlawˇsehˇ 3:21.

Nawˬ yaˇ htaꞈ haꞈ ve tehꞈ hpeuꞈ maw piˇ sheˍ. Awˬ pa awˬ e yaˇ htaꞈ haꞈ ve tehꞈ yaˇ shiˍ ve k’o, yaˇ awˬ pa awˬ e maˍ piˇ ve htaꞈ haꞈ yuˬ leh g’aꞈ te sha ve yoˬ.

“Ngaˬ hui ve yaˇ paˍ te yaꞈ htaˇ, yawˇ daꞈ ve hpawˇ dawˇ cheˆ jaw ve awˬ ceuˬ htaꞈ ngaˬ hui maˇ leunˇ ve tehꞈ, yaˇ yonˍ g’a tuˬ te piˇ ve yoˬ. Yawˇ chi teˇ pawˆ te yaꞈ taˍ ve htaꞈ coˇ caˇ leh gu ve k’o, yawˇ maˇ daꞈ ve chaw hpehꞈ ve tehꞈ ngaˬ hui maˇ shawˍ piˇ leh yawˇ htaꞈ ga piˇ tuˬ yoˬ.”—Daˍyeˍlaˆ.

LIꞈ HPU HK’AW BEˆ MAˍ LAˇ TAˍ VE: “Haꞈ pehnˇ ve lehˬ, dawˇ zuhˬ gaˇ zuhˬ leh ha kʼaˉ puiˉ ve yoˬ.”—1 Kawˇrenˍhtuˆ 13:4.