Rieyo nyathi en taye kata puonje. Seche moko mano oriwo rieyo nyathi sama otimo gimoro marach. Kata kamano, kinde mang’eny oriwo tiego nyathi mondo obed gi timbe mabeyo ma nyalo konye timo yiero mabeyo.

Higni moko mosekalo, jonyuol mathoth osebedo ka paro ni ka girieyo nyithindgi to mano biro miyo nyithindgi ochare. Kata kamano, jonyuol mariek keto ne nyithindgi chike moko ma nyalo tayogi kendo neno ni nyithindgi oluwo chikego.

“Dwarore ni oket ne nyithindo tong’ mondo gidong ka gin joma oriere. Nyithindo ma ok orie nyalo chalo gi yie ma onge gima chiko ma nyalo bayo yo kendo nyaloga kata nimo.”​—Pamela.

Tim gima isewacho kendo kik ilokri. Nyis nyithindi gima ibiro timonegi ka di po ni ok giluwo chike miketonegi. Komachielo, ka nyathi oluwo chik, to pwoye.

“Ajapwoyoga nyithinda sama giluwo chike ma aketonegi, nikech e piny ma sani nyithindo mang’eny ok winjga jonyuolgi. Kipwoyo nyithindi to biro bedonegi mayot mondo giyie gi riech mimiyogi sama gitimo gimoro marach.”​—Christine.

PUONJ MA MUMA CHIWO: “Gimoro amora ma ng’ato chuoyo, mano bende e ma noka.”​—Jo-Galatia 6:7.

Kik ikal tong’. Rie nyathi ka luwore gi hike, nyalone, kod ketho motimo. Kum ma imiyo nyathi onego oluwre gi ketho motimo. Kuom ranyisi, ka nyathini ok oluwo chike miketone e yo monego otigo gi simu, inyalo nyise ni koro ibiro maye simuno kuom kinde. Konchiel, kik iyi wang’ gi nyathi mana nikech ketho moko matindo tindo motimo.

“Atemoga nono ka be nyathina notamore winja goyiem koso paro e ma ne ok ong’ado e yo makare. Nitie pogruok e kind tim moro marach ma nyathi nyalo bedogo kod ketho moro ma nyalo bedo ni otimo minyalo wachne awacha to itieko gi kanyo.”​—Wendell.

PUONG MA MUMA CHIWO: “Kik ulwer nyithindu, mondo chunygi kik jogi.”​—Jo-Kolosai 3:21; weche moler piny.

Her nyithindi. Biro bedo mayot rieyo nyithindi ka ging’eyo ni irieyogi nikech iherogi.

“Sama wuodwa otimo ketho moro, wang’iyoga gik mabeyo ma nosegatimo kinde mokalo. Waleronega ni ketho motimono ok bi rucho gik mabeyo ma nosetimo, tek mana ni otimo lokruok ma dwarore. Wanyisega bende ni waikore konye timo lokruogego”​—Daniel.

PUONJ MA MUMA CHIWO: “Hera hore mos kendo ong’won.”​—1 Jo-Korintho 13:4.