Thununna tih thu mal hian kaihruai, a nih loh leh zirtîr tih awmzia a nei thei a. A châng chuan, naupang nungchang siam ṭhatna pawh a huam tel thei a. Mahse, a tlângpui thuin, naupangin nungchang ṭha a neih theih nâna zirtîrna a tel a ni.

Tûn hnai kum sâwmbi chhûng khân, nu leh pate chuan thununnain naupang chu mahni inngaihnêpna a neihtîr an hlauh avângin naupangte chu an thunun tawh lo va. Mahse, nu leh pa fingte chuan dân inâwm takte siamin, naupangte chu zâwm tûrin an zirtîr a ni.

“Naupangte chuan puitling fel tak rawn ni tûra ṭanpuitu tûr dânte an mamawh a. Thununna tel lo chuan, naupangte chu a karna awm lo lawng ang an ni a—a tâwpah, kawng bona, a nih loh leh chhiatna an tâwk thei a ni.”—Pamela-i.

Bei fan fan rawh. I fate chuan i dân siam chu an zui lo a nih chuan, a sawhkhâwk tûrte chu hrilh ang che. Kawng leh lamah, dân an zâwm a nih chuan fak ṭhîn rawh.

“Ka fate chu he thuâwih lohna khawvêla thu âwih taka an awm avângin ka fak ṭhîn a. Fakna chuan thunun a ṭûl hunah pawh an tân pawm a tiawlsam a ni.”—Christine-i.

BIBLE THU BUL: “Miin a theh apiang, chumi vêk chu a seng bawk dâwn si a.”—Galatia 6:7.

A âwm tâwk hre rawh. Naupang kum leh a hriatthiam theih chin azirin thunun dân tâwk hria ang che. Thil an tihsual hunah a sawhkhâwkte tawrhtîr chu a ṭha ber fo ṭhîn. Entîr nân, phone hman chungchânga i dân siam chu an zâwm lo a nih chuan, phone chu hun eng emawti chhûng hmantîr suh ang che. Chutih rualin, thil ho têah thinrim nghâl mai suh.

“Ka fa hian thu an âwih lo lui nge ni a, a ngaihtuah thiam lo mai zâwk tih hriat ka tum tlat ṭhîn. A zung chawpa paihbo ngai mize ṭha lo leh hriattîr ngai thil tihsual palh chu a inang lo a ni.”—Wendell-a.

BIBLE THU BUL: “In fate tinuar suh u; chutilochuan, an bei a dawng dah ang e.”—Kolossa 3:21.

Hmangaihna nei rawh. Nu leh pate’n thununna an pêk chhan ber chu an hmangaih vâng a ni tih naupangte’n an hriat hian an tân pawm leh zawm a awlsam lehzual a ni.

“Kan fapain thil a tihsual hian, thu tlûkna ṭha a lo siam tawhte avânga kan chhuanzia kan hrilh ṭhîn a. A ṭûl anga insiamrem a duh chuan a la tlai loh thu leh amah ṭanpui tûra kan inpeih reng thu kan hrilh a ni.”—Daniel-a.

BIBLE THU BUL: “Hmangaihnain a dawhthei a, ngil a nei bawk ṭhîn.”—1 Korinth 13:4.