ȲWOTꞌĪN NYꞌĪN KAPIAT
6. Waꞌĩ ere emempyt me
AIKOTĀ̃ MEIG̃.
Waꞌĩ ere emempyt me pote etimūꞌe hawyi etiporereto waku poꞌog̃ hamo. Miꞌi hamo etiꞌapiheg̃ emempyt toiꞌaparap pote hawyi etimūꞌe kan waku tutunug̃ hap. Miꞌitā̃ etunug̃ mote emempyt iweꞌeg̃ nakatno hamo.
KAT POTE MIꞌIT WAKU
Iraniaꞌīn ȳwotꞌīn nyꞌīn waꞌĩ taꞌatuꞌeꞌi iꞌatumempytꞌīn me taꞌatumoꞌarōt terānꞌi iꞌatumepytꞌīn pote sio teꞌerokenꞌ taꞌatumohit iꞌatumempytꞌīn hap upi. Maꞌato ȳwotꞌīn nyꞌīn iweꞌeg̃ nakaria waꞌĩ taꞌatuꞌe iꞌatumempytꞌīn iꞌatumūꞌe hamo.
amela e hap het rakat toꞌe — Waku waꞌĩ watoꞌe aimempytꞌīn me. Kotā̃ e hap. Mutūt porereto hat tohepap kahatoꞌi mutūt ereto hap pote mutūt minꞌe kuap. Miꞌi hap ewy hirokaria. Miꞌiria iꞌatuweꞌeg̃ꞌi miꞌi pote waku waꞌĩ watoꞌe miꞌiria e.
KAN WAKU ETUNUG̃.
Etunug̃ no aikotā̃ e hap ewy. Emempyt emontypotꞌi pote waꞌĩ ere ro. Toimontypot pote — Waku kahato waku ere tope.
Christine e hap het rakat toꞌe — Uimempytꞌīn uimontypot pote — Waku kahato are iꞌatuepe. Meketā̃ hap watunug̃ mote teꞌerenentup hamo waꞌĩ e hap kape ewy e.
TUPANA EHAY HENOI — Kat iãꞌỹi watikoi pote ti miꞌi ti raꞌyn imoētyt— Karasi 6:7.
Etimompyꞌahak kahato teiꞌo. Ȳt etiꞌapiheg̃ ipoityꞌi emempyt toiꞌaparap kurin pote. Kotā̃ e hap. Emempyt timontypotꞌi enãpin celular marik hap ete pote etat kuap hecelular.
Wendell e hap het rakat toꞌe — Arenentup kahato uimepyt tiꞌaparap tuwekaipyi sio ȳt hap kape. Toiꞌaparap tuereto hap hawyi toiꞌaparap tuwekaipyiꞌi hap teꞌeruweupi e.
TUPANA EHAY HENOI — Papaiꞌīn waku eweinãpin ehaꞌyruꞌīn ehakiꞌytꞌīn iꞌatukyꞌe hawuo wen maꞌato ȳt etimopyꞌahak teiꞌo ehehay saꞌag̃ wo. Etiꞌapiheg̃ apiheg̃ yn mote yi kape yn tehaꞌat aru hawyi iꞌarōt rakaria wo tukupteꞌen āt kaꞌap e. — Korosi 3:21
Etimoherep woꞌokyꞌe hap. Etinãpin emempytꞌīn woꞌokyꞌe hap wȳwo pote taꞌatumontypot terān.
Daniel e hap het rakat toꞌe — Karāmpe urumempyt tiꞌaparap pote — Uruipuenti waku kahato saꞌawyꞌi wuaria iminug̃ koꞌi. Pyno etimohampȳk emiꞌaparap pote uruiwaure hamo. Uruhoꞌopowȳro terān etimohampȳk emiꞌaparap urutoꞌe tope e.
TUPANA EHAY HENOI — Watiꞌatukyꞌe sese mītꞌīn mote watoig̃neꞌen iwese kahato rakatno wuatꞌi eꞌāt pe— 1 Kurintiu 13:4.
