VITHEMI
6: Kunangula
KULUMBUNUNA VIKA?
Lijwi lya kunangula linatha kulumbununa kutwamenena nambe kulongetha. Thimbu imo likalumbununa kwolola mwana nga naviyitha. Cho lalo linambatethelela kulongetha mwana athzivuke kwangula vyuma vyavivwa ku vyavivi.
VIKWAPWILA KWA THEHO
Mu vithimbu vya kunima, vithemi kuvakele na kunangula vana mu vinanga vyavingi mwafwa vatewele ngwavo nga vavanangula, cho valimona kupwa vangocho. Oloni vithemi va kunyanyama vakaka mashiko na kulongetha vana vavo mangana vaononoke.
Pamela ngwendi: “Vana vanapande kuvaleka vyuma vivanapande kulinga nevi kuvapandele mangana vakole mwamuvwa. Nga kuvavalongetha, vana vatha kupwa ngwe vwato vwa kujeneka chuma chije chivwendetha, cho vuvombela.”
VIMWATHA KULINGA
Twaleleleniho. Nga muneni kakavangeya vinangulo vimunamuleke, cho mulekeni vyuma vikatundamo. Oloni nga napangetha vimunamunangula, muthzumbangeyeni.
Christine ngwendi: “Njikathzumbangeya vana vange ha kwononoka, nameme vali muno mu kaye kakavi. Kuthzumbangeya vana kuvalingitha vakavangeye vinangulo vivanavanangula.”
CHINANGULO CHA MU MBIMBILIYA: “Munu ateja vije vyanakuvile.”—Ngalatiya 6:7.
Pweni vaka-kuthzivithitha. Nga munangula mwana uje naviyitha, thinganyekeni myaka yali nayo, cho munanguleni kwetheketha na myaka yendi. Kunyanyametha mwana nga naviyitha kwapwa kwa theho. Chakumwenako, nga kapangetha mwamuvwa foni imunamwana, mwatha kumunyekayo, na kukamwilwithilayo kulutwe. Cho lalo kethi mupwithe mulonga waundondo kupwa wakama.
Wendell ngwendi: “Munange nga naviyitha, thimbu kanda njilingeho chimo, njikashaka kuthzivuka vinamulingitha alinge ovyo vyuma.” Kunangula mwana uje nathevuka lumo, kunalithethza na kunangula mwana uje akelukila ilukila kuthevuka.
CHINANGULO CHA MU MBIMBILIYA: “Vithemi kethi mushangumune vana veni, kutewa vombwa.”—Kolose 3:21.
Kaleni na chithzemo. Vana vatha kutambula vwathi kunangula nga vathzivuka ngwavo vithemi vavo vavathzema.
Daniel ngwendi: “Munetu mwakele na kuthevuka twamwanukithile ngwetu twakele na kuvwahelela manene ha vyuma vyavivwa vyakele na kulinga kunima. Twamulekele ngwetu nga kelukila kulinga vyuma vyanalingi, cho lithzina lyendi kulivihya. Cho twamuleke lalo ngwetu tushaka kumukwatha.
CHINANGULO CHA MU MBIMBILIYA: ‘Chithzemo chili na likakateya na kutetela.’—1 Kolinte 13:4.
