Ina hereva matahakani anina na, ta ba hakaua eiava ba hadibaia. Nega haida, anina na natu e kereremu neganai isisiba henina karana. To nega momo, una na natu maraḡina amo kara maorona ihadibana karana e herevalaiamu danu, unu amo gabeai ia ese abi hidi maorodia baine kara diba.

Vanegai laḡani ten gunadia amo, kahirakahira ruma momo lalodiai matahakani karana na da lasi, badina tama sina na e laloamu matahakani karana ese natu edia hemami bae hadikaia garina. To, laloparara tama sina ese taravatu namodia bae ato diba bena natudia bae durudia unu taravatu bae badinadia totona.

“Natu na edia kara hetoadia bae diba na namo, unu amo bae bada neganai taunimanima namodia ai baela diba. Bema matahakani na lasi, natu na vaitani kada asi tarina heḡereḡerena​—ena heau dalana basine badinaiamu eiava baine hebubu diba.”​—Pamela.

O atomu taravatudia ba badina. Bema natumu ese emu taravatu se badinamu, matana ba hakania. To danu, bema natumu ese e badinamu, ba hanamoa na namo.

“Natu ese e kamonai henigumu neganai, hanaihanai na hanamodiamu badina hari ina gwau-edeede tanobadana ai kamonai karana na lasi. Unu na hanamodia tomamu dainai, e kereremu neganai egu sisiba na e abi daemu.”​—Christine.

BAIBUL ENA SISIBA: “Taunimanima e hadomu ḡaudia heḡereḡeredia mo bae abi.”​—Galatia 6:7.

Basio kara auka. Natu laḡanina, ena diba, bona ena kerere ena bada ba haerodia namonamo guna, unu amo matahakani maorona ba heni diba. Kerere ahuna na e karaia kererena heḡereḡerena ai ba heni​—heḡereḡere, ena fon na o ato taravatudia heḡereḡerena se ḡaukaralaia dainai, nega taina lalonai ena amo ba kokia. To namona na baita henari namonamo kerere maraḡidia na ḡau badadia ai basita halao.

“Nega momo na uramu baina diba, bema natugu e karaia kererena na mai ena ura ibounai ida e karaia, eiava se lalo namonamo dainai e karaia. Namona na ina na baita diba, kara dika badana be baita kokia, a kerere be baita hahedinaraia mo.”​—Wendell.

BAIBUL ENA SISIBA: “Natumui basio turia riki henidia, lalodia bae hesiku na garina.”​—Kolose 3:​21.

Lalokau ba hahedinaraia. Natumu ese matahakani na be abia daemu bona be badinaia haraḡamu, bema be dibamu tama eiava sina ese e heni matahakanina na mai ena lalokau ida e karaia.

“Natumai merona e kereremu negadiai, a hadibaia gunamu e kara abi hidi namodia na a moalelaimu. Bona a hadibaiamu ena kerere tamona ese ia ladana namona basine hadikaia nohomu ela bona bema sisiba baine abia dae bona baine badinaia, bona a hamaoroamu danu ai na nonoho baia durua totona.”​—Daniel.

BAIBUL ENA SISIBA: “Lalokau na e haheauka taritarimu; lalokau na mai ena heabi-dae.”​—1 Korinto 13:4.