AVYAZI
6: Kusunda
VINO CIKAPILIULA
Izwi lyakuti kusunda likasenula ukuti kutungulula nanti kusambilizya. Insita zimwi, izwi lii likaomba nu ku kulungika umwana pa viipe vino watacita. Ilingi kwene mu kucita vii mwaya nu kupeela umwana ivyeo ivingamwazwa kumanya vino angaya ni miyele isuma na vino angapingula ningo pa vintu.
CINO CACINDAMILA
Pa myaka ingi iyafumako, kusunda kusiomba sana mu ndupwa izingi, pano avyazi yakalola kwati kusunda umwana kungalenga alola ukuti yatamucindika. Lelo, avyazi ya mano yakapangila ana masunde asuma nu kuyasambilizya vino yangalondela masunde yayo.
“Ana yakalondekwa kuyasambilizya vino yafwile kucita na vino yatafwile kucita pakuti yakakule ningo. Ukwaula kuyasunda ningo, ana yakaya wa wato uwakuti insita ili yonsi ungaundwa.”—Pamela.
VINO MUNGACITA
Mwayasunda lyonsi. Ndi cakuti umwana winu atakulondela masunde yano mwamupeela, mwamunena pa viipe ivingafumamo. Nupya mwaezya na maka kutaizya umwana ndi cakuti akulondela masunde.
“Ilingi nkataizya sana anane pali vino yaya ni cuvwila mu nsi ii muno mwaya antu ataaya ni cuvwila. Kuyataizya kukalenga ciyangupalile ukulondela kusunda kuno mwayapeela.”—Christine.
CISINTE CA MULI BAIBO: “Muntu akazombola kulingana na vino wakomela.”—Galatiya 6:7.
Mwaelenganyapo sana. Lino mukusunda umwana, mwalola na pa musinku uno ayelilepo alino na pali vino wataluvyanya. Mulinzile ukusunda umwana kulingana na vino wataluvyanya, wakwe ndi cakuti asikuomvya ningo foni cingazipa nga mwatala mwamupoka nanti ukumuzumilizya ukulaiomvya sile limwi limwi. Nupya, mutaasoka zuwa na pa tuntu tunono sile.
“Nkatala indondelezya indola icali calenga umwanane kucita cino namulesya, indola nga ali wacitila ku mufulo nanti watafilwa sile ukupingulapo ningo. Paaya upusano pa kutwalilila ukucita iciipe na pa kuluvyanya sile ukwaula ukumanya, kuno ungalungika muntu awele asenuke.”—Wendell.
CISINTE CA MULI BAIBO: “Mwe akwasi, namwe mutasosya ana inu, pano limwi yanganenuka.” —Kolose 3:21.
Mwaya nu kutemwa. Ana cikayangupalila kulondela kusunda ndi cakuti iyamanya ukuti cino mukucitila vivyo a pa mulandu wakuti mwayatemwa.
“Umwana witu ndi waluvyanya, twamunenanga ukuti twatemwanga sana pali vino wapingulangapo ningo ukucisila. Twamulondolwelanga ukuti vino wacisile vitali nu kulenga tute kumutaila lelo walinzile sile kuombelapo pali vino waluvyanyanga nupya twali nu kumwazwa.”—Daniel.
CISINTE CA MULI BAIBO: “Kutemwa kukateeka mwenzo nupya ukwa luse.”—1 Kolinto 13:4.
