Ababi
6: Osinyusa
ENATAPULELA DDI?
Osinyusa podi otapulelaga weddiha obe ohudhiha. Malabo mamodha podi ohoweleyaga omusinyusa mwaana mwaha wa ekalelo yaye yabure. Dila dhowinjhivadhene omulela mwanawo fumuhudhiha ele eri yapama ni yabure. Ndo anere ohudhera othoma dhithu dhapama mwigumini mwaaye ni kanahowelege osinyusiwa.
EKALELE DDI YOFUNEYA?
Yaka ndha dhogomihera enakala ninga ababi kinaasinyusa aniwa. Aliwa enubuwela wi wasinyusa ahima podi ovugula thima enniwana. Mbwenye ababi athotho ehikanna makalelo apama owahudhiha aniwa wihina yawiwelelege.
“Anamwani enohowela waddeliwa ethu yapama ni yabure wihina yunnuwe mwamakalelo apama. Anamwani yahisinyusiwaga enaligana ni baruku ahinna lemi. Baruku ahinna lemi wavira mudhidhi anoorimela ofiyedha ofuthukuwa.” — Pamela.
KI ONERE DDI?
Owogege ebaribari. Mwanawo ahiharaga dhithu onawogiwe, omusinyuse. Mbwenye eragana dhithu dhapama omutamalelege.
“Miyo ginowatamalelesa anaaga mwaha wiwelela naari nigari elabo ela yabure. Nakanna elemelelo yowatamalela anihu, enerege wakweyela orumedha naasinyusaga.” — Christine.
BIBLIYA ANAWOGA EGI: ‘Mwaha dhithu anadhala muthu, anere ohadda.’ — Gálatas 6:7.
Okale owezeya. Wezege yaka anna mwanawo, wunnuwelavo waye ni ethuya aviriganihiliye. Mwaana aasinyusiwaga mwaha ethu eriliyena, oliye anowonelamo. Motajhiha, podi wera mwanawo kanawiwelela wodhela makalelo olabihedha telefoni. Ndo we podi othoma wi alabihedhege telefoni mudhidhi vang’ono obe omala mwana malabo ohinvahedhile. Akala mwanawo kerilena ethu yowopiha, kuthabwe omunyanyuwela.
“Miyo ginosayela onona akala mwanaga kagiwelele mwaha wofuna obe akala athomme ethu ahubuwele pama. Mwaha vihikala ohiyana wodhela ekalelo yabure anna muthu enahoweleya ogwadda musisiya obe othapanyedha yoviriganiha.” — Wendell.
BIBLIYA ANAWOGA EGI: ‘Ababi, kamwanyanyuwelege aninyu, wihina munawuukule.’ — Colossenses 3:21, nota.
Woonihe odhivela. Anamwani enowakweyela orumedha osinyusiwa yanona wi makolwiwa enasinyusa nuudhivela.
“Mwanihu aviriganiha ethu, nookanna elemelelo yomutamalela mwaha wa dhithu dhapama aathomiliye. Nowoga wihina erana ethu-sithu wihina awomihedhe ele aviriganihiye kanonge emuthu yaye. Yofuna yehu sowi anone wi niri epaddi yaye mudhidhi wamutene nimukaviheraga.” — Daniel.
BIBLIYA ANAWOGA EGI: ‘Odhivela winoovilela ni fwapama.’ — 1 Coríntios 13:4.
