Gama ro kuti kupangira ringareva kutungamirira kana kujijisa. Nguva jimweni, zvinobatanija kurungamisa mwana anonga acikazwi. Asi kazinji, irona rinonangira kujijisa mwana kuti azive zvakanaka no zvakashata. Ngo kudaro, iyena anozokwanisa kutema zvivaringo zvaushoni, acikadikani kupangihwa.

Makore ano, vabari vamweni avacapangiri vana vavo, ngokuti vanothya kuti vanozokura vacijivona inga kuti avasisiri. Asi vabari vano uzivi vanopa vana vavo mutemo no kuvajijisa kuti vajizwire.

“Vana vanodikana kupuwa mutemo kuti vakure ushoni. Vana vacikapangihwi, vakadari inga ngarava icina hasvi. Ngarava icina hasvi ainesehwi kuti itohwe ngo mbhepo kana kutovinduka kamare.”—Pamera.

Mucadova mundhu anocinja zvaananga. Mwana wenyu paanotama kuzwira mutemo jamakadira, munodikana kumupangira. Asi, munodikana kumusimba paanonga wazwira.

“Vana vakawanda nyamasi uno, avazwiri vabari vavo. Ngo kudaro, ndinogara ndecisimba vana vangu ngo kuzwira kwavo. Kuvasimba, kunoita kuti ivona vatame kunesehwa kutendera kupangira kwandinovaita pazvinodikana weya.”—Kristina.

BHAIBHERI RINOTI: “Zvaanosima mundhu, ngo zvaanozokotora.”—Vagaratiya 6:7.

Ivanyi mundhu anozwisisa. Pamunonga mecipangira mwana wenyu, vonanyi kuti ano makore mangana, ngozvapi zvaanokwanisa kuita. Munodikana kuvonavo dangani zvaaitaro zvakashata maningi kana kuti haiwa. Munodikana kupangira mwana wenyu kudari washaisha ciri cese. Inga mezaniso, zvingaita kuti iyena washaisha kushandisa foni, mungatomutorera foniyo kana kumutendera kuti aishandise pa nguva jamunoda imwimwi. Asi mucaita kuti ciro cidoko caposa mwana wenyu cova inga ciro cikuru maningi.

“Kudari mwana wangu washaisha, ndinoeja kuzwisisa kuti wazviita ngo cabomo kana zvatoitikavo hazvo. Ngo kuti pano musiyano mukuru maningi pa kuva no cirovejeso cakashata no kuita ciro ngo kuposa.”—Wenderi.

BHAIBHERI RINOTI: “Mucacamwisa vana venyu kuti vatame kuvora mwoyo.”—Vakorose 3:21.

Khombijanyi kuti munovada. Vana vanokasika kutendera mbhangiro, kudari vaciziva kuti vabari vavo vari kuita zvondhozvo ngokuti vanovada.

“Mwana wedu paiita ciri cese cakashata, taimuceukija zviro zvaushoni zvaakaita, tomuvhunja kuti taidada ndizvona. Taimusanangurira kuti, ciro caaposaro acicaireva kuti iyena watova mundhu wakashata. Caisisira cainga co kuti, iyena waidikana kuita ciri cese kuti aitise nane, nokutizve itusu tiripo kuti timubesere.”—Dhanyeri.

BHAIBHERI RINOTI: “Rudo hunosengerera.” —1 Vakorinte 13:4.