Tikinmelajkatlalis mokoneuan kijtosneki tikinyekanas, tikinmachtis niman noijki tikimijlis tlen xkuajli okichiujkej. San ika, noijki kijtosneki tikimititis tlen kuajli uelis kichiuaskej niman ijkon maka manopopolokan.

Aman, miyekej tajtin xok kinmelajkatlaliaj inkoneuan pampa nomojtiaj kinyolkokoskej. San ika, oksekimej tajtin akin kintlasojtlaj inkoneuan kinmakaj seki tlanauatiltin tlen xouijtika niman kimititiaj kenon kintlakamatiskej.

“Noneki tikimijliskej tokoneuan tlenon kichiuaskej niman tlenon xnoneki kichiuaskej. Ijkon, ijkuak uejueyiyaskej kimatiskej tlen kichiuaskej niman kuajli noyekanaskej. Tla xijkon tikchiuaj, yeskiaj ken se barco tlen xakaj kiyekantiuj, sakin uelis nopopoloskej niman tlajyouiskej” (Pamela).

Xchiua tlen tikijtoua. Xkijli mokoneuj ika uelis tikmaas noso tikajuas tla xmitstlakamati, niman ijkuak xmitstlakamatis, xchiua tlen yotikijlika. San ika, ijkuak mitstlakamatis xkijli ika melak kuajli tlen kichiua.

“Ijkuak nokoneuan nechtlakamatij, nikimijlia ika melak kuajli tlen kichiuaj pampa aman melak miyekej kokonej xok tetlakamatij. Ijkuak ijkon nikchiua, yejuamej xouijtika kitaj kiseliskej noso kichiuaskej tlen nikimijlia” (Christine).

TLEN BIBLIA KIJTOUA: “Tlen kitokas sen tlakatl, sano yejua kipixkas” (Gálatas 6:7).

Xteasikamati. Ijkuak tikmelajkatlalis mokoneuj, xkita tla melak xkuajli tlen okichiuj, kech xiujtli kipiya niman tla nochi kasikamati. Ijkuak tikijlia mokoneuj tleka tikmelajkatlalia, yejua kiselia niman más kipaleuiya. Tla mokoneuj xkitlakamati tlen otikijli itech kenon kitekitiltis icelular, uelis tijkuilis seki tonaltin. San ika, maka xkualani ipampa itlaj tlen xueyi kijtosneki san pampa tejua xtikuelita.

“Kuajli nikita tla nokoneuj xonechtlakamat san pampa xokinek noso tla pampa onopopolo. Xsan noijki kijtosneki tikmelajkatlalis ijkuak itlaj tlen xkuajli okichiuj ken ijkuak tikpaleuis makasikamati ika onopopolo” (Wendell).

TLEN BIBLIA KIJTOUA: “Tatajtin, maka xkinkuajkualanikan nemokoneuan, para maka najmanaskej hasta kampa yolajsiskej” (Colosenses 3:21).

Xtetlasojtla. Mokoneuan kitaskej tla tikinmelajkatlalia ika tlasojtlalistli niman kasikamatiskej tleka tikinyektlalia, yejon kinpaleuis maka melak manopopolokan.

“Tikijliayaj tokoneuj kenon techyolpaktiaya nochi tlen kuajli kichiuaya, san ika, ijkuak nopopolouaya, tikijliayaj ika maka manajmana pampa yejon ueliskia kiyektlalis niman tejuamej tikpaleuiskiaj” (Daniel).

TLEN BIBLIA KIJTOUA: “On yejuan tetlajsojtla tlajtlamach kimijyouilia oksekimej niman yolyemanki” (1 Corintios 13:4).