MA E TAU MATUA
6: Akonaki
KO E KAKANO
Ko e kupu akonaki kua kakano ke takitaki po ke fakaako. He falu mogo, putoia e fakatonu he mahani nakai omaoma he tama. Ka e fa foaki e fakaakoaga he tau mahani ke lagomatai e tama ke iloa ke taute e tau fifiliaga mitaki he kamataaga.
KAKANO NE AOGA
He tau tau loga kua mole, kua teitei galo e akonaki he falu magafaoa ha kua matakutaku e tau matua neke fakalolelole e tama ka fakatonu. Ka ko e tau matua lotomatala kua fakatoka e tau matafakatufono lagotatai ti fakaako e tau fanau ke omaoma ki ai.
“Ko e tau fanau kua lata ke fai fakakaupā ke lagomatai a lautolu ke tutupu hake ko e tau tagata lalahi kua mitaki. Ka nakai akonaki, ko e fanau kua tuga e poti ne nakai fai muivaka ti fakahiku tafea po ke lifa.”—Pamela.
MENA KE TAUTE E KOE
Ua hikihiki fano. Ka nakai muitua e tama ke he tau matafakatufono haau ti tala age e tau fua ka moua. Kaeke ke omaoma e tama haau ti nava lahi ki a ia.
“Nava tumau e au e fanau haaku pete ni ko e omaoma kua lavea he lalolagi nei. Ko e nava kua mukamuka lahi ki a lautolu ke talia e fakatonuaga kua lata.”—Christine.
MATAPATU FAKAAKOAGA HE TOHI TAPU: “Ha ko e mena kua gana he tagata, ko e mena ia ni ke helehele mai ai e ia.”—Kalatia 6:7.
Kia fakalatalata. Ka akonaki, manamanatu ke he tau moui he tama mo e lotomatala mo e lekua. Fa mahani ke lauia mitaki e akonaki ka matutaki mo e lekua, tuga ka fakaaoga fakahehē e telefoni to utakehe fakakū ai mai ia lautolu. He magaaho taha, kalo kehe he eke e tau lekua ikiiki mo tau lekua lalahi.
“Lali au ke mailoga ko e nakai omaoma pauaki e tama haaku po ke hehē e onoonoaga haana. Kua kehekehe e taute he mena hepe lahi ti lata ke huo kehe mo e hehē ne lata ke fakalaga.”—Wendell.
MATAPATU FAKAAKOAGA HE TOHI TAPU: “Aua neke fakalagalaga e tau fanau ha mutolu, neke fakalolelole e tau loto ha lautolu.”—Kolose 3:21.
Kia fakaalofa. Ko e akonaki kua mukamuka lahi he fanau ke talia mo e fakagahua ka iloa e lautolu kua fakaalofa mooli e matua.
“He taute he tama taane ha maua e tau hehē, tala age a maua kua matalahi a maua ke he tau fifiliaga mitaki ne taute e ia kua mole. Fakamaama e maua ko e hehē kua nakai tumau ka taute e ia e tau hikihikiaga kua hako mo e ko maua ke lagomatai a ia ke taute e mena ia.”—Daniel.
MATAPATU FAKAAKOAGA HE TOHI TAPU: “Kua fakauka e fakaalofa, to totonu.”—1 Korinito 13:4.
Liga Manako Foki a Koe
KO E KOLO TOKO
Akonaki Fēfē e Koe e Tau Tama Haau?
Fakamaama he Tohi Tapu tolu e puhala he akonaki kua lauia mitaki.
