KULI MAKOLO
6: Kulangiza
VAMENE VUCHITIKA
Mawu akuti kulangiza angatanthauzesoti kusogolela olo kuphunzisa. Nthawe ziyakine mawu amene aŵa onena za kulangiza mwana akayamba kunyalanyaza. Koma nthawe zinyinji, onena za kuphunzisa mwana minkhalidwe iweme kuti akokwanisha kusankha vinthu mwanzelu.
NDAŴA YANJI KUGANIZILA NKHANI YAMENE IYI N’KOFUNIKA?
M’vyaka vapita kwalombapano, makolo anyinji aleka kulangiza ŵana ŵawo poyopa kuti akaŵazuzula ŵana amene awo angayambe kuliwona kuti ni osafunika. Komalomba makolo amene oganiza luweme oikila ŵana ŵawo malamulo komasoti kuŵayavya kukonkheja malamulo amene awo.
A Pamela enena kuti—“Ŵana ofunika kuŵauja vakufunikila kuchita na vasafunika kuchita kuti azankhale ŵanthu odalilika akazakula. ŵana amene ophunzisiwalini na makolo ŵawo onkhala monga ni sitima yamene iliye dilaiva yamene ikungokuya kulikonse mpaka kuchita ngozi.”
VAMENE VAMUNGACHITE
Osati mukochinja-chinja. Keno mwana okonkhejalini malamulo ŵemwiika, mukomupasa chilango. Komalomba mukomutembeja akokonkheja vemwimuuja.
A Christine enena kuti—“Nthawe zinyinji nutembeja ŵana ŵangu chifukwa chakuti onimvwila. Vunikondwelesha ngako chifukwa ŵano masiku ŵana anyinji ochitalini vamene ivi. Mwana keno mumutembeja, ovutikalini kulondela uphungu keno waphoniyesha vinthu viyakine.”
MFUNDO YA M’BAIBOLO: “Chilichonse chamene munthu chawakomola, azawejesoti chamene icho.”—Agalatiya 6:7.
Chilango chikokatijana na nsinkhu wa mwana. Mukopeleka chilango kuli mwana, mukoganizila nsinkhu wake, vakukwanisha kuchita komasoti kukula kwa vinthu vawaphoniya—mwachisanzo, keno okatishilalini ntchito luweme foni yake, mungamulonde kuti osati aikatishilesoti ntchito kwa kanthawe olo mungamuleshe kuchita vinthu viyakine pa foni yamene iyo. Komasoti osaluŵa kuti vunkhalalini luweme kukulisha nkhani itontho.
A Wendell enena kuti—“Nikaliye peleka chilango nenzefuna kusimikijila kuti mwana wamene uyo wachita vinthu mwalona olo keno kwenze tyala kuphoniyesha. Keno ochita vinthu vamene ivo volakwika moweleja-weleja angafunikile kumupasa chilango. Koma keno kwangonkhala kuganiza mwaumwana, mungamulangize tyala.”
MFUNDO YA M’BAIBOLO: “Osaŵakalipisha ŵana ŵanu, kuti angankhale okwinyilila.”—Akolose 3:21.
Mukowonesha chikondi. Ŵana ovutikalini kulondela chilango komasoti kukonkheja vinthu vaujiwa akaziŵa kuti atata ŵawo olo amayi ŵawo ochita vamene ivi chifukwa chakuti oŵakonda.
A Daniel enena kuti—“Mwana wasu akaphoniyesha vinthu viyakine, tenzemuuja kuti tukondwela na vinthu viweme vakuchita. Tenzemuujasoti kuti keno angawamyelini vala vawaifya, angaifye mbili yake. Ndipo tenzemusimikijila kuti nise okonzeka kumuyavya.”
MFUNDO YA M’BAIBOLO: “Chikondi n’choleza ntima komasoti n’chiweme ntima.”—1 Akorinto 13:4.
