BAKENG SA BATSWADI
6: Go Laya Bana
SEO SE RA GO RE’NG?
Lentšu tayo le ka bolela go hlahla motho goba go mo ruta. Ka dinako tše dingwe, lentšu leo le ka bolela go phošolla ngwana ge a selekile. Eupša gantši tayo e bolela go thuša ngwana go ithuta go dira diphetho tše dibotse di tloga fase.
KE KA BAKA LA ENG GO LAYA BANA GO LE BOHLOKWA?
Mengwageng e sa tšwago go feta, batswadi ba bangwe ba tlogetše go laya bana ba bona ka ge ba nagana gore go ba laya go dira gore ba thome go inyatša. Lega go le bjalo, batswadi ba bohlale ba beela bana ba bona melao yeo e sa ba gatelelego e bile ba ba tlwaetša go phela ka yona.
Pamela o re: “Bana ba swanetše go beelwa melao e le gore ba gole gabotse. Ge bana ba sa laiwe, ba tla swana le seketswana seo se se nago lehuduo. Ba tlo dira diphetho tše di fošagetšego gomme ba tsena mathateng.”
SEO O KA SE DIRAGO
O se ke wa fetoša seo o se boletšego. Ge e ba o boditše ngwana wa gago gore o tlo mo otla ge a sa kwe, dira bjalo. Eupša ge a go kwa, mo rete.
Christine o re: “Ka ge re phela lefaseng la batho ba go se kwe, ke dula ke reta bana ba ka ka ge ba ekwa. Ka ge ke dula ke ba reta, go ba bonolo gore ba theetše ge ke ba laya.”
MOLAO WA MOTHEO WA BEIBELE: “Se sengwe le se sengwe seo motho a se bjalago, ke sona seo a tlago go se buna.”—Bagalatia 6:7.
Naganela ngwana. Ge o laya ngwana wa gago, mo laye o naganne ka mengwaga ya gagwe, bokgoni bja gagwe le bogolo bja phošo yeo a e dirilego. Ngwana o a kwa ge kotlo e sepedišana le phošo yeo a e dirilego. Ka mohlala, mmotše gore ge e ba a šomiša founo gampe, o tlo mo tšeela yona go fihlela ka nako e itšego. Ka lehlakoreng le lengwe, o se ke wa tšea taba e nyenyane wa e dira e kgolo, feela ka gobane wena o e tšea e le e kgolo.
Wendell o re: “Ke leka go bona ge e ba ngwana wa ka a dirile phošo ka boomo goba go se bjalo. Go na le phapano magareng ga mokgwa o mobe woo o swanetšego go tumolwa ka medu le phošo feela yeo e swanetšego go lokišwa.”
MOLAO WA MOTHEO WA BEIBELE: “Le se ke la befediša [goba go tena] bana ba lena e le gore ba se nyame.”—Bakolose 3:21.
Rata bana ba gago. Go bonolo gore bana ba amogele tayo ge ba bona gore batswadi ba bona ba ba laya ka gobane ba ba rata.
Daniel o re: “Ge morwa wa rena a be a dirile phošo, re be re mo reta pele ka dilo tše dibotse tšeo a di dirilego nakong e fetilego. Ka morago ga moo, re be re mo hlalosetša gore phošo yeo a e dirilego e be e sa mo dire motho yo mobe ge feela a be a ka se e bušeletše. E bile re be re mmotša gore re nyaka go mo thuša.”
MOLAO WA MOTHEO WA BEIBELE: “Lerato ga le fele pelo e bile le botho.”—1 Bakorinthe 13:4.
You May Also Like
MOROKAMI
O Swanetše go Laya Bana ba Gago Bjang?
Beibele e hlalosa dikarolo tše tharo tša go nea tayo ka tsela e holago.
PHAFOGA!
Go Diregile Eng ka Tayo?
Na taba yeo e boletšwego ka bo-1960 e sa dutše e kgoma tsela yeo batswadi ba godišago bana lehono?
MOROKAMI
Go Laya Bana
Go se dumelelane tseleng yeo le swantšego go godiša ngwana go ka kgoma lapa ka tsela e mpe. Ithute seo banyalani ba ka se dirago.
PHAFOGA!
Kamoo o ka Layago Ngwana wa Gago yo a Lego Mahlalagading
Go laya go bolela go ruta. Melao ya motheo ya Beibele e ka go thuša gore o rute ngwana wa gago yo a lego mahlalagading kamoo a ka bontšhago go kwa go e na le go rabela.
