VOKUNA OVANA
6: Viyulei Ovana Venyi
OTYO OTYITYI?
Okuviyula omunthu okumulongesa. Pamwe tyina omona amalingi etyi tyapenga otyiwa umwe okumuviyula. Mahi haunene ondaka oyo ipopia okulongesa nawa omona opo haa etyivile okulinga ovipuka nonondunge.
OITYI OTYIPUKA OTYO TYESUKISILA?
Pahe ngoti ovohe kavaviyula vali ovana vavo, mokonda vasoka okuti ine veveviyula ovana kamavakala nawa. Mahi ovohe vokuhanda ovana vavo vekule nonondunge, vevepopila umwe etyi vena okulinga, netyi vahapondola okulinga, avevelongesa oñgeni vapondola okuendela muetyi vevepopila.
“Opo ovana vekule nonondunge ovohe vena umwe okuvepopila etyi vena okulinga. Ine ovana kavalongeswa, vakala vala ngombapolo yehena oulandi. Ombapolo oyo ipondola okuendapo kapii, mahi haa aipinunuka.” — Pamela.
OITYI UPONDOLA OKULINGA?
Wahaponwe. Ine omona vove ketavela, mupopila ovivi vituka kokuheivi. Tyina amalingi otyipuka tyimwe otyiwa, tyikahi nawa, mupandula.
“Apeho ndyipandula ovana vange mokonda yetyi vetavela, ngwe mouye omu katyakakele. Ngwe tyina upandula ovana, na tyina haa uveviyula vetavela liwa.” — Christine.
ONONDUNGE MBO MBIMBILIYA: “Etyi omunthu akuna tupu otyo makateya.” — Ova Galata 6:7.
Soka kovana vove. Tyina omona alinga etyi tyapenga, wahasoke vala kotyivi tyatyo alinga, mahi tupu soka keti liae, no ku etyi ei. Tyina uviyula omona viyula umwe etyimono okuti etyi alinga tyapenga, kwemuviyulile vala onya. Ine wemupopila onoola ena okumanga otelefone yae mahi ngwe ehekutavela alambesa onoola ombo, upondola okumupola-yo oiholeka ononthiki mbumwe. Mahi tupu tyihanda okulunguka wahanumanene vala oupuka oututu.
“Tyina omona wange alinga etyi tyapenga, tete ndyiovola okunoñgonoka ine wetyilingila tyawina, ine wetyilinga vala motyiponyo. Ovipuka ovio viesukisa umwe okuvinoñgonoka, mokonda ine wetyilingila tyawina tuna umwe okumuviyula ehetyipalaike vali. Mahi ine wetyilinga motyiponyo pamwe otyiwa vala okumupula okuti: ‘Iya walinga ñgeni ya?’” — Wendell.
ONONDUNGE MBO MBIMBILIYA: “Onwe vohe, muahakandukilei ovana venyi opo vahasoye.” — Ova Kolosu 3:21, okatoi.
Vetekulei nawa. Ovana vetavela okuviyulwa tyina vetyimona okuti ovohe veveviyula tupu okuvehole.
“Tyina ankho omona wetu amalingi tyimwe tyapenga, tumuhinangelesa ovipuka oviwa alingaile-ale. Tumupopila okuti ine ulikuatesila aviukisa ovipuka, ovanthu kamavemupopi omapita. Ankho tuahanda etyimone okuti tuli pano tumukuateseko.” — Daniel.
ONONDUNGE MBO MBIMBILIYA: ‘Wokuhole vakuavo wapua-elundo, una okankhenda.’— 1 Ova Kolindu 13:4.
Hamwe Noove Uhanda
OMUTALA WOMULAVI
Oñgeni Una Okulonga Ovana Vove?
Ombimbiliya ipopia ovipuka vitatu pala okulonga nawa ovava.
