KWA ABEREKI
6: Kulanga
THANDAUZO LACE
Fala lakuti kulanga lingathandauze kutsogolera ayai kupfunzisa. Nthawe zinango, limbaphatanidza kutsimula mwana akasaya kubvera. Koma nthawe zizinji, kulanga ni kupfunzisa mwana wanu kusiyanisa cabwino na cakuipa. Na tenepo, iye ambapfunza momwe angacitire bzinthu bzabwino ndipo an’dzafunikira lini kumbatsimulidwa.
THANGWE RANYI MPSAKUFUNIKA?
Ntsiku zino, bzikuwoneka kuti abereki winango akulanga lini wana wawo. Iwo ambakumbuka kuti akawatsimula wanawo angabziwone kuti mbakufunika lini. Abereki wabwino, ambaikhira malamulo wana wawo ndipo ambawathandiza kuti ayateweze.
Pamela adati: “Wana an’funika kumbauzidwa bzomwe angacite na bzomwe an’funika lini kucita kuti bzinthu bzidzawafambire bwino akadzakula. Wana omwe ambalangidwa lini, ali ninga barko lomwe iribe giyadore ndipo imbayenda kuli-kwentse licicita ngozi.”
BZOMWE MUNGACITE
Lekani kumbacinja bzomwe mumbalewa. Penu mwana wanu akuteweza lini bzomwe mwamuuza, imwepo mun’funika kumuthandiza. Koma mwanayo akabvera, mbamutendani.
Christine adati: “Nthawe zentse nimbatenda wana wangu akandibvera thangwe ntsiku zino wana azinji akubvera lini abereki wawo. Tikambatenda wana wathu, bzin’dzakhala bzakusaya kunesa kwa iwo kubvuma kutsimulidwa.”
NFUNDO YA M’BIBLIYA: ‘Ciri-centse comwe munthu an’bzala, cimweco ndico comwe an’dzabvuna.’—Wagalata 6:7.
Mbalangani wana wanu mwakubverana na misinkhu yawo. Mukambalanga mwana wanu, mbakumbukirani msinkhu wace, bzomwe ambakwanisa kucita na kukula kwa mulandu omwe wacita. Kawiri-kawiri munthu ambaphatisira basa malango yomwe wapasidwa yakhala yakubverana na kuphonya komwe wacita. Mwa ciratizo, pinango mwana wanu angabvere lini bzomwe mudamuuza momwe angaphatisire foni. Penu bziri tenepo, mungamuuze kuti ambaphatise basa pang’ono foniyo ayai mungamutengera mu ntsiku zakucepa. Tsono penu bzomwe wacita mwana wanuyo mpsikulu lini, imwepo lekani kuikulisa nkhaniyo.
Wendell adati: “Ndikanati kupereka malango kwa mwana wangu, cakuyamba nimbayezera kubvesesa penu mwanayo wacita utowa ayai wandophonyambo. Penu iye akuphonya mwakubwereza-bwere, an’funika kulangidwa. Tsono penu waphonya thangwe ra kusaya kukumbuka bwino, iye angafunikire kutsimulidwa basi.”
NFUNDO YA M’BIBLIYA: ‘Lekani kumbakalipisa wana wanu, kuti angasuname.’—Wakoloso 3:21.
Mbalatizani lufoyi. Wana ambanesa lini kubvuma na kuphatisa basa malango yomwe abareki wawo ambawapasa akadziwa kuti akuwapasa thangwe ambawafuna.
Daniel adati: “Mwana wathu akaphonya, kawiri-kawiri tikhamuuza kuti timbakomedwa na bzabwino bzomwe iye akhabacita. Tikhamuuza pomwe kuti akakonza bzomwe waphonyabzo mbiri yace inikhala yabwino. Ndipo tikhamutsimikizira kuti tinim’thandiza.”
NFUNDO YA M’BIBLIYA: ‘Lufoyi limbapirira, licidekera mtima.’—1 Wakolinto 13:4.
