AWOVOLƐ
6: Ɛdenrɛdenrɛlɛ
MƆƆ ƆKILE LA
Edwɛkɛkpɔkɛ ɛdenrɛdenrɛlɛ kola kile kɛ ɛkile awie adenle anzɛɛ ɛkilehile ye. Ɔdwu mekɛ ne bie a, ɔkola ɔkile kɛ ɛmaa kakula bie ahakyi subane bie mɔɔ ɔlɛ la. Fane dɔɔnwo ne ala, eza ɔkile kɛ ɛtete kakula wɔamaa yeanwu kɛzi ɔbazi kpɔkɛ kpalɛ la.
DEƐMƆTI ƆHYIA LA
Kenlensa ye bɛndenrɛdenrɛ ngakula wɔ awuke dɔɔnwo anu, ɔluakɛ awovolɛ ne mɔ sulo kɛ saa bɛtea ngakula ne mɔ a ɔnrɛmaa bɛnrɛlie bɛ nwo bɛnrɛli. Noko, awovolɛ mɔɔ anye gyi bɛ ti anwo la di mɛla mɔɔ fɛta la maa bɛ mra na bɛtete bɛ bɛmaa bɛdi zo.
“Ɔwɔ kɛ bɛboa ngakula bɛmaa bɛnwu mɔɔ ɔwɔ kɛ bɛyɛ nee mɔɔ ɔnle kɛ bɛyɛ la amaa bɛanyi bɛayɛ mgbanyinli mgbalɛ. Ngakula mɔɔ bɛndenrɛdenrɛ bɛ la le kɛ ɛlɛne mɔɔ ɛnlɛ ɛdahoma la, ɔbahola yeaminli azule nye anzɛɛ yeabutu.”—Pamela.
MƆƆ ƐBAHOLA WƆAYƐ LA
Di wɔ edwɛkɛ zo. Saa ɛ ra anli wɔ mɛla zo a, nea nwu ye kɛ wɔhwe ɔ nzo. Na saa ɔdi zolɛ noko a kanvo ye.
“Meta mekanvo me mra kɛ bɛyɛ tieyɛ wɔ ewiade mɔɔ menli ɛnyɛ tieyɛ wɔ nu anu la. Saa mekanvo bɛ a, ɔmmaa ɔnyɛ se kɛ bɛbalie ɛdenrɛdenrɛlɛ bɛado nu.”—Christine.
BAEBOLO NGYINLAZO: “Mɔɔ sonla kɛlua la yɛɛ ɔbu a.”—Galeehyeama 6:7.
Te bɛ edwɛkɛ bo. Saa ɛtenrɛdenrɛ kakula bie a, anrɛɛ suzu ye ɛvolɛ, mɔɔ ɔkola ɔyɛ nee mɔɔ ɔngola ɔnyɛ nee anyebolo mɔɔ wɔ ɛtane mɔɔ yeyɛ anu la anwo. Saa bɛfa nvonleɛ mɔɔ kakula bayɛ la anwo anzohwenlɛ bɛmaa ye a, ɔboa kpalɛ—kɛ neazo la, saa yeanva fonu ne yeanli gyima wɔ adenle kpalɛ zo a, bɛbahola bɛalie bɛavi ɔ sa nu wɔ mekɛ bie anu. Mekɛ ko ne ala, mmamaa ninyɛne ngyikyi mɔɔ anwo ɛngyia la ka wɔ ɛya.
“Mebɔ mɔdenle kɛ mebanwu kɛ saa me ra ne anye fuu a yeanyɛ tieyɛ anzɛɛ nvonleɛ ala a rale a. Ngakyile kpole wɔ subane ɛtane mɔɔ ɛha awie anwo mɔɔ ɔwɔ kɛ bɛtu ɔ bo, yɛɛ nvonleɛ mɔɔ awie ɛyɛ mɔɔ ɔwɔ kɛ bɛmaa ɔnwu ye la anu.”—Wendell.
BAEBOLO NGYINLAZO: “Bɛmmaka bɛ mra ɛya na bɛ sa nu ando.”—Kɔlɔsaema 3:21; ɔbodwɛkɛ.
Da ɛlɔlɛ ali. Saa ngakula ze kɛ ɛlɔlɛ ti a bɛ awovolɛ ɛlɛtenrɛdenrɛ bɛ a, ɔmmaa ɔnyɛ se kɛ bɛbadie na bɛava bɛali gyima.
“Saa yɛ ra nrenyia ne yɛ nvonleɛ bie a, yɛmaa ɔnwu kɛ yɛ nye die kpɔkɛ kpalɛ kɔsɔɔti mɔɔ ɔsisile la anwo. Yɛkilehile nu yɛkile ye kɛ saa ɔyɛ nvonleɛ na ɔyɛ nzenzaleɛ mɔɔ fɛta la a, ɔngile kɛ ɔ nyunlu ɛgua aze na yɛwɔ ɛkɛ ne kɛ yɛbaboa ye.”—Daniel.
BAEBOLO NGYINLAZO: “Ɛlɔlɛ lɛ abotane yɛɛ ɔ ti akunlu le kɛnlɛma.”—1 Kɔlentema 13:4.
