E palabra disciplina por nifica guia of siña. Tin biaha, esey por encera corigi mal conducta di un yiu. Pero mayoria di biaha e ta nifica siña bo yiu principionan cu por yud’e tuma bon decision ora e bira adulto.

Den e ultimo decadanan, casi no tin disciplina mas den algun famia pasobra mayornan tin miedo cu si nan corigi nan yiunan, esey lo tin un mal efecto riba nan balor propio. No obstante, mayornan sabi ta pone regla rasonabel pa nan yiunan y ta siña nan pa aplica e reglanan aki.

“Yiunan tin mester di sa kico tin mag y kico no tin mag, ya cu esey lo yuda nan crece y bira adultonan maduro. Sin disciplina, yiunan ta manera un boto sin timon, cu finalmente lo perde rumbo y hasta naufraga.”—Pamela.

Sea consistente. Si bo yiu no ta sigui bo reglanan, splic’e cu su accionnan lo tin consecuencia. Pero si e ta obedece, elogi’e pa esey.

“Regularmente mi ta elogia mi yiunan pa nan obediencia a pesar di e echo cu nos ta biba den un mundo caminda casi no tin hende obediente mas. Si bo elogia nan, lo ta mas facil pa nan acepta ora bo tin cu duna nan coreccion.”—Christine.

PRINCIPIO DI BIJBEL: “Kico cu un hende sembra, esey lo e cosecha tambe.”—Galationan 6:7.

Sea rasonabel. Ora bo ta disciplina bo yiu, tene cuenta cu su edad, su habilidad y con serio loke el a haci ta. Un straf hopi biaha ta mas efectivo ora e tin di haber cu e malo cu el a haci. Por ehempel, si e no sigui bo reglanan encuanto uzo di telefon, e consecuencia lo ta cu temporalmente e lo no tin mag di uza su telefon of e tin mag di uz’e pa cierto cos so. Pero na mes momento purba di no rabia pa algo sin importancia djis pasobra esey a irita bo.

“Ami ta purba saca afo si mi yiu a desobedece mi pa malo of si e no por a yuda. Tin un diferencia entre haci algo robes bes tras bes pa motibo di un problema di caracter cu bo mester corigi y un fout pa cua bo mester djis hala su atencion.”—Wendell.

PRINCIPIO DI BIJBEL: “No provoca boso yiunan pa nan no desanima.”—Colosensenan 3:21, nota.

Sea amoroso. Ora un yiu sa cu su mayornan ta disciplin’e principalmente pasobra nan ta stim’e, ta hopi mas facil pa e yiu acepta nan disciplina y sigui e reglanan cu nan a pone.

“Ora nos yiu homber haci fout, nos ta bis’e cu nos ta orguyoso di dje pa tur e bon decisionnan cu el a tuma den pasado. Y nos ta splic’e cu e fout cu el a haci no ta daña su reputacion si e haci e cambionan necesario y cu nos ta cla pa yud’e.”—Daniel.

PRINCIPIO DI BIJBEL: “Amor tin pasenshi y ta bondadoso.”—1 Corintionan 13:4.